శ్రీదేవి ఆకస్మిక మరణం వెనుక కారణాలు ఇవేనా?

అందాల తార నింగికి ఎగసింది. అతిలోక సుందరి శ్రీదేవి కార్డియాటిక్ అరెస్ట్ కారణంగా ఆకస్మికంగా ప్రాణాలు వదిలింది. ఆమె మరణానికి కారణాలేంటి? అందంగా కనిపించడం కోసం ఆమె తీసుకున్న అతి జాగ్రత్తలే కారణమా? సర్జరీలే ఆమె ప్రాణాలు బలితీసుకున్నాయా..? ఈ విషయాల్లో స్పష్టత లేకున్నా.. సోషల్ మీడియాలో మాత్రం శ్రీదేవిని బలితీసుకున్న కారణాలు అవేనన్న కథనాలు ప్రచారంలో ఉన్నాయి.

బరువు తగ్గడం కోసం శ్రీదేవి ఆహారం విషయంలో చాలా జాగ్రత్త పడేదని, ప్రొటీన్ డైట్ తీసుకునేందని తెలుస్తోంది. ఆమె బరువు తగ్గానికి సర్జరీలు చేయించుకునేదని, ముఖంపై ముడతలు రాకుండా బోటెక్స్‌ ఇంజెక్షన్లను ఆశ్రయించేదట. ఇందుకోసం ఆమె తరచుగా కాలిపోర్నియాలోని ఓ కాస్మోటిక్ క్లినిక్‌కు రెగ్యులర్‌గా వెళ్లేదని తెలుస్తోంది.

‘బరువును కంట్రోల్‌లో ఉంచుకోవడం కోసం ఆమె హైడ్రాక్సైల్ డ్రగ్స్ తీసుకునేది. ఈ డ్రగ్స్ వల్ల ఆకలి చచ్చిపోయి.. మెటాబాలిక్ రేట్ పెరగడం వల్ల హృదయ స్పందనల వేగం పెరుగుతుంది. ఫలితంగా బలమైన గుండె పోటు వస్తుంది. కానీ ప్రాణం పోదు. దీంతో ఎప్పుడు చనిపోతామో తెలియని భయంతో బతకు ఈడ్చాల్సి ఉంటుంది. కానీ శ్రీదేవి మాత్రం హార్ట్ ఎటాక్ కారణంగా చనిపోవడం ఓరకంగా అదృష్టంగా భావించాలేమో’ అనేది ఓ వాట్సాప్ కథనం సారాంశం.

చాలా ఏళ్ల క్రితమే శ్రీదేవి ముక్కు సర్జరీ చేసుకుంది. ఇటీవల పెదాలు అందంగా కనిపించడం కోసం ఆమె ఇంజెక్షన్ చేయించుకున్నారట. కానీ అది కాస్తా బెడిసికొట్టడంతో పెదాలు వాచి, ముఖం అదోలా తయారైందనే వార్తలు వచ్చాయి. సర్జరీల ప్రభావం వల్ల వయసు మీద పడుతున్నా శ్రీదేవి అందంగానే కనిపించింది. కానీ ఆమె ముఖంలో ఒకప్పుడున్న కళ మాత్రం మాయమైంది.

54 ఏళ్లు వచ్చినా.. శ్రీదేవి అందంగా అలనాటి శ్రీదేవిలాగే కనిపించాలని కోరుకోవడానికి కారణం ఏంటి? బాలీవుడ్‌లో ఉన్న పోటీనా..? ఆమెను భర్త బోనీ కపూర్ అలాగే చూడాలని కోరుకున్నాడా..? కారణలేమైనా.. అతిలోక సుందరి మాత్రం ఈ లోకాన్ని విడిచిపోయింది. అందంతోపాటు ఆరోగ్యం పట్ల కూడా తగిన శ్రద్ధ వహించాలని ఆమె జీవితం మాత్రం నేటి తరానికి పాఠాలు చెబుతోంది.