Krishnam Raju Last Rites: తన అంత్యక్రియలు ఎవరు చేస్తారో ముందే చెప్పిన కృష్ణంరాజు

సినీ నటుడు, మాజీ కేంద్రమంత్రి కృష్ణంరాజు అంత్యక్రియలు మొయినాబాద్ సమీపంలోని కనక మామిడిలో ఉన్న ఫామ్‌హౌస్‌లో నిర్వహించనున్నారు. అయితే కృష్ణంరాజుకి కొడుకులు లేకపోవడంతో.. అంత్యక్రియలు ఎవరు నిర్వహిస్తారనే దానిపై చర్చ నడించింది. కాగా.. ప్రభాస్ అన్నయ్య ప్రభోద్ (Prabhas Brother Prabodh) చేతుల మీదుగా అంత్యక్రియలు జరిపించనున్నారు. కుటుంబానికి పెద్దకొడుకైన ప్రభోద్ కృష్ణంరాజుకి తలకొరివి పెడతారని కుటుంబ సభ్యులు తెలిపారు.

అయితే కృష్ణంరాజు చనిపోవడానికి ముందే తనకు కర్మక్రియలు ఎవరు నిర్వహించాలనే దానిపై మాట్లాడారు. అప్పట్లో ఏబీఎన్ ఓపెన్ హార్ట్ విత్ ఆర్కే కార్యక్రమంలో పాల్గొన్న కృష్ణంరాజు.. తన కర్మక్రియల గురించి మాట్లాడిన వీడియో క్లిప్ ఇప్పుడు వైరల్ అవుతోంది. యూట్యూబ్‌లో టాప్ ట్రెండింగ్‌ అవుతోంది.

ఇంతకీ ఆయన ఈ వీడియోలో ఉన్న సారాంశం ఏంటంటే.. కృష్ణంరాజుకి ఇద్దరు భార్యలు కాగా.. మొదటి భార్య యాక్సిడెంట్‌లో చనిపోయారు. వీరికి ఒక కూతురు కాగా.. కూతురి పెళ్లి అప్పట్లో చాలా ఘనంగా జరిపించారు కృష్ణంరాజు. ఆ తరువాత శ్యామలా దేవిని రెండో పెళ్లి చేసుకున్నారు కృష్ణంరాజు. వీరికి ముగ్గురు ఆడపిల్లలు. కొడుకు కోసం వేచి చూసిన కృష్ణంరాజు దంపతుల కోరిక తీరలేదు. అయితే కొడుకులు లేరనే లోటు తన అన్నకొడుకులు ప్రభాస్, ప్రభోద్‌లతో తీరిందని చెప్పారు కృష్ణంరాజు.

తాను హిందూ ధర్మాన్ని పాటిస్తానని.. సోల్ ఆఫ్ ది డెత్ అనే పుస్తకం ద్వారా చనిపోయిన తరువాత జరిగే కర్మక్రియల గురించి తెలుసుకున్నానన్నారు. అలాంటిదే వస్తే.. తనకి కొడుకులు లేరన్న ఫీలింగ్ లేదని.. తన సోదరుడికి ఇద్దరు కొడుకులు ఉన్నారు కాబట్టి.. వాళ్లు కూడా నా కొడుకులు లాంటి వాళ్లే కాబట్టి.. వాళ్లే కర్మక్రియలను జరిపిస్తారని ఆర్కేకి ఇచ్చిన ఇంటర్వ్యూలో తెలిపారు కృష్ణంరాజు.. ఆయన కోరుకున్నట్టుగా ప్రభాస్ అన్నయ్య ప్రభోద్ పెదనాన్న కృష్ణంరాజుకి కర్మక్రియలు జరిపించారు.