Renu Desai: నువ్వూ ఒక తల్లికే పుట్టుంటావ్.. రేణు దేశాయ్ ఫైర్

రేణు దేశాయ్ అంటే ఒకప్పటి మోడల్, నటి, కాస్ట్యూమ్ డిజైనర్, దర్శకురాలు. కానీ, ఆమె పేరు చెబితే వీటిలో ఏ ఒక్కటీ ముందుగా గుర్తుకురావు. కేవలం పవన్ కళ్యాణ్ మాజీ భార్య అని మాత్రమే ఎవరికైనా గుర్తొస్తుంది. పవన్ కళ్యాణ్ నుంచి రేణు దేశాయ్ విడిపోయి చాలా కాలమే అయినా ఇంకా ఆమెను ‘మాజీ భార్య’గానే చాలా మంది సంబోధిస్తున్నారు. కానీ, ఇలా పిలవడం ఆమెకు ఏ మాత్రం నచ్చడంలేదు.

ఇంతకాలం, ఈ విషయంలో పవన్ కళ్యాణ్ అభిమానులతో యుద్ధం చేసిన రేణు దేశాయ్.. తొలిసారి ఒక ఫిల్మ్ న్యూస్ వెబ్‌సైట్‌పై మండిపడ్డారు. ఫాదర్స్ డే సందర్భంగా ఆమె శుభాకాంక్షలు చెబితే దాన్ని కూడా పవన్ కళ్యాణ్‌కు ముడిపెడ్డటాన్ని రేణు జీర్ణించుకోలేకపోయారు. అందుకే, ఫేస్‌బుక్ ద్వారా ఏకి పారేశారు.

అసలు ఏం జరిగిందంటే.. ఆదివారం ఫాదర్స్ డేను పురష్కరించుకుని రేణు దేశాయ్ ఇన్‌స్టాగ్రామ్‌లో ఒక పోస్ట్ చేశారు. ‘తండ్రులందరికీ, ఒంటరిగా ఉంటోన్న తల్లులందరికీ ఫాదర్స్ డే శుభాకాంక్షలు’ అని ఈ పోస్ట్‌లో రేణు దేశాయ్ పేర్కొన్నారు. అలాగే, శ్రీనగర్‌లోని హజరత్‌బల్ దర్గా వద్ద తన పిల్లలతో తీసుకున్న ఫొటోను రేణు ఈ పోస్ట్‌లో పొందుపరిచారు.
ఇంత వరకు బాగానే ఉంది. అయితే, ఈ ఫొటోను తీసుకుని సదరు ఫిల్మ్ న్యూస్ వెబ్‌సైట్ తన ట్విట్టర్ ఖాతాలో పెట్టింది. పవన్ కళ్యాణ్ మాజీ భార్యతో ఆయన పిల్లలు అని క్యాప్షన్ కూడా పెట్టింది. ఈ ట్వీట్‌ రేణు దేశాయ్‌కు ఆగ్రహం తెప్పించింది. ‘ఇప్పుడే ఎవరో నాకు ఇది పంపించారు. ఈ ఆర్టికల్ రాసిన వ్యక్తి ఒక తల్లికే పుట్టి ఉంటాడు. ఒక తల్లిని ఇలా బాధ పెట్టకూడదు ఎప్పుడూ’ అంటూ ఫేస్‌బుక్‌లో రేణు దేశాయ్ ఎమోషనల్ పోస్ట్ పెట్టారు. ఆ వెబ్‌సైట్ చేసిన ట్వీట్ స్క్రీన్ షాట్‌ను కూడా పోస్టులో పొందుపరిచారు.