పవన్ కల్యాణ్ భార్యను కాను.. ఆయనతో కలవను!

తిరిగి పవన్ కల్యాణ్ తో కలిసి పోవచ్చు కదా.. మీరిద్దరూ మళ్లీ కాపురం చేయవచ్చు కదా.. అని సోషల్ మీడియాలో పవన్ ఫ్యాన్స్ నుంచి తనకు వస్తున్న సూచనలపై స్పందించింది రేణూదేశాయ్. అది జరిగే పని కాదు అని ఆమె స్పష్టం చేసింది. ‘ఎందుకంటే.. నేను ఇప్పటికే పవన్ కల్యాణ్ తో విడాకులు తీసుకున్నాను, పవన్ వేరే పెళ్లి కూడా చేసుకున్నాడు.. కాబట్టి, ఇప్పుడు పవన్ కల్యాణ్ భార్య అంటే నేను కాదు..’ అని రేణూదేశాయ్ పేర్కొన్నారు. ఈ మేరకు ఆమె సోషల్ మీడియాలో ఒక పోస్టుతో పవన్ ఫ్యాన్స్ కు వివరణ ఇచ్చింది.

పవన్ తో తిరిగి కలిసిపోవాలని సోషల్ మీడియా ద్వారా తనకు అనునిత్యం చాలా మంది ఫ్యాన్స్ సూచనలు చేస్తుండటంతో రేణూ స్పందించినట్టుగా తెలుస్తోంది. కొన్నేళ్ల కిందట పవన్, రేణూలు విడాకులు తీసుకున్న సంగతి తెలిసిందే. ఆ తర్వాత పవన్ అన్నా అనే విదేశీ మహిళను వివాహం చేసుకున్నాడు. వారిద్దరికీ ఒక కూతురు కూడా ఉంది. విడాకుల తర్వాత తామిద్దరం స్నేహితుల్లా మెలుగుతున్నట్టుగా రేణూదేశాయ్ చెబుతూ ఉంటారు.

అయితే అభిమానులు మాత్రం ఈ విషయంలో ఊరికే ఉండటం లేదట. ‘పవన్ మా అన్న.. మీరు మా వదిన.. ఎప్పటికీ మీరు మా వదినే, కాబట్టి మీరు తిరిగి పవన్ తో కలిసిపోండి..’ అంటూ రేణూకు సోషల్ మీడియా ద్వారా వీరు సూచనలు, సలహాలు పంపుతున్నట్టుగా తెలుస్తోంది. దీంతో ఇలాంటి సందేశాలన్నింటికీ రేణూ ఒకే సారి సమాధానం ఇచ్చింది. పవన్ తో తిరిగి కలవడం అంటూ ఉండదు. చట్టపరంగా విడిపోయాం.. పవన్ వేరే పెళ్లి కూడా చేసుకున్నాడు.. ఇక మీరు ఇలాంటి సూచనలు చేయవద్దు.. అని రేణూ దేశాయ్ తన ఫాలోయర్లకు స్పష్టతను ఇచ్చింది.