రణ్‌బీర్ యంగ్.. అందులో తప్పేముంది: రిషి కపూర్

బాలీవుడ్ స్టార్స్ ఎంత బ్రాడ్ మైండెడ్‌గా ఉంటారో అలనాటి నటుడు రిషి కపూర్ కామెంట్స్ చూస్తే అర్థమవుతోంది. ఆయన కొడుకు, స్టార్ హీరో రణ్‌బీర్ కపూర్‌కు సంబంధించిన ఓ ఫొటో ఇప్పుడు సోషల్ మీడియాలో వైరల్ అవుతోంది. ఆ ఫొటోలో రణ్‌బీర్, పాకిస్థాన్ నటి మహిరా ఖాన్.. న్యూయార్క్‌లోని ఓ హోటల్ బయట పొగతాగుతూ కనిపించారు. ఈ ఫొటో ఇప్పటికే ఇంటర్నెట్‌లో వైరల్‌గా మారింది. సంజయ్ దత్ బయోపిక్‌లో చిత్రీకరణలో భాగంగా ఈ ఏడాది జూన్‌లో న్యూయార్క్ వెళ్లినప్పుడు ఎవరో తీసిన ఫొటో అది. అయితే ఈ ఫొటోపై ఇప్పటికే సోషల్ మీడియాలో విమర్శలు గుప్పిస్తున్నారు. రణ్‌బీర్, మహిరా కలసి పొగతాగడంపై ఏవేవో రూమర్లు సృష్టించేస్తున్నారు.

రణ్‌బీర్ కానీ, మహిరా కానీ ఈ రూమర్లపై ఇప్పటి వరకు స్పందించలేదు. అయితే మరో బాలీవుడ్ నటి పరిణీతి చోప్రా మాత్రం మహిరాకు అండగా నిలబడింది. ఆ ఫొటోపై విమర్శలు గుప్పించడం అన్యాయమని, సిగ్గుచేటని వ్యాఖ్యానించింది. తాజాగా రణ్‌బీర్ తండ్రి రిషి కపూర్ కూడా దీనిపై స్పందించారు. ‘నేను ట్విట్టర్ మాత్రమే వాడతాను. వాళ్లను నేను ట్విట్టర్‌లోనే చూశాను. అయినా ఈ విషయం నాకు ఇంతకుముందే తెలుసు. రణ్‌బీర్ ఒక యంగ్ స్టార్. అతనికి పెళ్లికాలేదు, బ్యాచలర్. అతనికి ఇష్టమైన వ్యక్తులను కలిసే హక్కు ఉంది. అతని స్వేచ్ఛను బయటపెట్టాలని ప్రయత్నించడం సరికాదు. అంతకు మించి నేనేం చెప్పలేను, ఎందుకంటే అతను యువకుడు.. ఏ అమ్మాయినైనా కలిసే అవకాశం అతనికి ఉంది’ అని రిషి కపూర్ చెప్పుకొచ్చారు.

‘ఈ ఫొటోలో అంతకుమించి ఇంకేదో ఉందని మనకి ఎలా తెలుస్తుంది? వారొక రెస్టారెంట్‌‌కి వెళ్లారు. అక్కడ పొగ తాగకూడదు. అందుకే బయటికొచ్చి సిగరెట్ కాలుస్తున్నారు. యూఎస్‌లో నిబంధనలు చాలా కఠినంగా ఉంటాయి. పబ్లిక్ ప్లేసుల్లో పొగ తాగకూడదు. ఇంతకు మించి నాకేం తెలీదు’ అని వివరణ ఇచ్చారు.