Vijay & Rashmika: ఎయిర్‌పోర్ట్‌లో రష్మిక, విజయ్.. మాల్దీవులకు వెళ్తున్నారా? మళ్లీ ప్రేమ పుకార్లు!

Vijay Devarakond & Rashmika Maldives: క్యూట్ హీరోయిన్ రష్మికా మందన ముంబై ఎయిర్‌పోర్టులో తళుక్కుమన్నారు. అమితాబ్ బచ్చన్‌తో కలిసి ఆమె (Rashmika Mandanna) నటించిన ‘గుడ్‌బై’ సినిమా శుక్రవారం ఉదయమే ప్రేక్షకుల ముందుకు రావడమే కాకుండా.. మంచి టాక్ అందుకుంది. ఈ నేపథ్యంలో ఆమె వకేషన్ ట్రిప్‌కు పయనమైనట్లు తెలుస్తోంది. అయితే, ఎయిర్‌పోర్టుకు రష్మిక రావడానికి కాస్త ముందే స్టార్ హీరో విజయ్ దేవరకొండ (Vijay Deverakonda) కూడా చేరుకోవడం ఇప్పుడు హాట్ టాపిక్‌గా మారింది. ఈ సూపర్ హిట్ జోడీ మాల్దీవుల ట్రిప్‌కు వెళ్తోందంటూ ఊహాగానాలు చక్కర్లు కొడుతున్నాయి. ఇద్దరూ కలిసి రొమాంటిక్ ట్రిప్ ప్లాన్ చేసుకున్నారని కొన్ని ఆంగ్ల పత్రికలు రాశాయి.

గీత గోవిందం (2018), డియర్‌ కామ్రేడ్‌ (2019) సినిమాలతో సినిమాలతో ఆన్‌స్క్రీన్‌ లవ్లీ పెయిర్‌గా గుర్తింపు తెచ్చుకున్నారు విజయ్‌ దేవరకొండ, రష్మిక మందన. తెరపై వీరి మధ్య రొమాన్స్ అద్భుతంగా పండింది. ‘లైగర్‌’ తర్వాత విజయ్‌ దేవరకొండ తన తదుపరి చిత్రం ‘ఖుషి’పై దృష్టి పెట్టారు. ఇక ‘పుష్ప’ సినిమాతో దేశవ్యాప్తంగా క్రేజ్‌ సంపాదించుకున్న రష్మిక మందన బాలీవుడ్‌లో బిజీగా మారిపోయారు. అక్కడ వరుస ప్రాజెక్ట్‌లకు ఓకే చెప్పేశారు.

వర్క్ లైఫ్‌తో బిజీగా ఉన్న విజయ్‌ దేవరకొండ, రష్మిక మందన కాస్త విరామం తీసుకున్నట్లు తెలుస్తోంది. ఈ క్రమంలోనే శుక్రవారం ఉదయం ముంబై ఎయిర్‌పోర్ట్‌లో వీరిద్దరూ దర్శనమిచ్చారు. వీరిద్దరూ కలిసి మాల్దీవులకు టూర్‌ వెళ్తున్నారంటూ మీడియాలో కథనాలు ప్రచురితమయ్యాయి. దీంతో విజయ్‌ - రష్మిక ప్రేమలో ఉన్నారనే వార్తలు మరోసారి తెరపైకి వచ్చాయి.

రష్మిక, విజయ్ డేటింగ్‌లో ఉన్నారనే వార్తలు ఎప్పటి నుంచో ప్రచారంలో ఉన్నాయి. అయితే, ఈ వార్తలను వీరిద్దరూ గతంలోనే ఖండించారు..

‘నా కెరీర్ తొలి దశలో రష్మికతో కలిసి రెండు సినిమాలు చేశాను. రష్మిక ఒక డార్లింగ్. ఆమె నాకు మంచి ఫ్రెండ్ మాత్రమే. మేం సినిమాల గురించి అనేక విషయాలను పరస్పరం షేర్ చేసుకుంటాం. అలా మా మధ్య బంధం ఏర్పడింది. కాస్త సన్నిహితంగా ఉండటం వల్ల ఆ బంధాలు వేగంగా అభివృద్ధి చెందుతాయి. సాధారణంగా, ఒక అమ్మాయిని కళ్లలోకి చూస్తూ కూర్చోవడానికి కూడా నాకు కొంత సమయం పడుతుంది’ అని విజయ్ దేవరకొండ అన్నారు.

తమ డేటింగ్‌పై వచ్చిన రూమర్లపై రష్మిక కూడా గతంలో స్పందించారు. అవి క్యూట్ పుకార్లు అంటూ కొట్టి పడేశారు. విజయ్ తనకు మంచి స్నేహితుడని పేర్కొన్నారు. తాజా పుకార్లపై ఈ జంట ఏం చెబుతుందో వేచి చూడాలి..!