Tej I Love You: తేజ్ ఫస్ట్ డే కలెక్షన్లు షాకింగ్‌గా..

శుక్రవారం విడుదలైన ‘తేజ్ ఐ లవ్యూ’పై హీరో సాయిధరమ్ తేజ్, దర్శకుడు కరుణాకరన్ భారీగా ఆశలు పెట్టుకున్నారు. ఇది మరో ‘తొలిప్రేమ’ అవుతుందంటూ చిత్ర యూనిట్ మొదటి నుంచి నమ్మకంగా చెప్పింది. దీంతో ఈ సినిమాపై అంచనాలు అధికమయ్యాయి. కానీ థియేటర్లలో తేజ్ నిరాశపరిచాడు. యూత్, ఫ్యామిలీ ఆడియెన్స్‌కు దగ్గరయ్యే సబ్జెక్ట్‌ అయినప్పటికీ.. ప్రేక్షకుల మనసును కట్టిపడేసే సీన్లు ఏవీ లేకపోవడంతో నెగటివ్ టాక్ వచ్చింది. ఈ ప్రభావం కలెక్షన్లపై పడింది.

తొలి రోజు ఈ చిత్రం ఏపీ, తెలంగాణల్లో సుమారు రూ.2 కోట్ల షేర్ మాత్రమే రాబట్టిందని ట్రేడ్ అనలిస్ట్ తరణ్ ఆదర్శ్ తెలిపారు. నిజాం ఏరియాలో రూ.70 లక్షలు, సీడెడ్‌లో రూ.32 లక్షలు, తూర్పు గోదావరిలో రూ.15 లక్షలు, పశ్చిమ గోదావరిలో రూ.12 లక్షల చొప్పున తేజ్ కలెక్షన్లు రాబట్టాడు. గుంటూరులో 25 లక్షలు, కృష్ణా జిల్లాలో రూ.12 లక్షలు, నెల్లూరులో కేవలం రూ.60 వేలు మాత్రమే తొలి రోజు వసూలు అయ్యాయని తరణ్ ఆదర్శ్ తెలిపారు.

ఓవరాల్‌గా ఈ చిత్రం మొదటి రోజు తెలుగు రాష్ట్రాల్లో రూ.1.98 కోట్ల షేర్ రాబట్టగా.. రూ.3.10 కోట్ల మేర గ్రాస్ రాబట్టిందని సమాచారం. శని, ఆదివారాల్లో ఈ సినిమా ఎంత బిజినెస్ చేస్తుందో చూడాలి మరి.