సూర్య పక్కన ఛాన్స్ కొట్టేసిన ఫిదా బ్యూటీ!

‘ఫిదా’ సినిమాతో తెలుగు ప్రేక్షకుల మనసు కొల్లగొట్టిన సాయి పల్లవి వరసగా మంచి అవకాశాలు దక్కించుకుంటోంది. తెలుగుతో పాటు తమిళంలోనూ ఈ బ్యూటీకి అవకాశాలు క్యూ కట్టాయి. ఈమెకు స్టార్ హీరో సూర్యతో నటించే ఛాన్స్ వచ్చిందని తాజా సమాచారం. సెల్వరాఘవన్ దర్శకత్వంలో త్వరలో ఓ సినిమా సెట్స్ మీదకి వెళ్లనుంది. ఈ సినిమాలో ఓ హీరోయిన్‌గా ఇప్పటికే రకుల్ ప్రీత్ సింగ్‌ను ఓకే చేశారు. ఈ విషయాన్ని రకులే వెల్లడించింది. అయితే మరో ముఖ్యమైన పాత్ర కోసం సాయి పల్లవిని సంప్రదిస్తున్నట్లు తెలుస్తోంది.

ప్రస్తుతం సాయి పల్లవి నటించిన 'ఎంసీఏ' సినిమా డిసెంబర్ 21న విడుదలవుతున్న విషయం తెలిసిందే. సూర్య నటించిన 'తానా సెరిందా కూట్టం' సినిమా కూడా జనవరిలో ప్రేక్షకుల ముందుకు రానుంది. 'గ్యాంగ్' పేరుతో ఈ సినిమాను తెలుగులోనూ విడుదల చేస్తున్నారు. దీని తర్వాత వీరిద్దరి కలయికలో కొత్త సినిమా రానుంది.