హృతిక్‌రోష‌న్‌ సరసన సైఫ్ కూతురు సారా

బాలీవుడ్ నటుడు సైఫ్‌ అలీఖాన్ కుమార్తె సారా అలీ ఖాన్ చిత్ర రంగ ప్రవేశం ఖాయమైంది. అరంగేట్రంతోనే బాలీవుడ్ అందగాడు హృతిక్‌రోష‌న్‌ సినిమాలో అవకాశం అందుకుంది. కరణ్ మల్హోత్రా దర్శకత్వంలో రూపొందే ఈ చిత్రంలో హృతిక్‌ సరసన సారా నటించనుంది. సైఫ్ అలీఖాన్, అమృతాసింగ్‌ల కుమార్తె సారా గతంలో కరణ్ జోహార్ చిత్రంతోనే ఎంట్రీ ఇస్తుందని అనుకున్నారు.

కానీ కరణ్‌, అమృతాసింగ్‌‌ల మధ్య విబేధాల వల్ల ఈ ప్రాజెక్ట్ నుంచి సారాను తప్పించారని బాలీవుడ్ జనాలు అప్పట్లో గుసగులాడుకున్నారు. సారా సినీ రంగ ప్రవేశానికి 2016లోనే సైఫ్ పచ్చ జెండా ఊపారు. కరణ్ మల్హోత్రా దర్శకత్వంలో వచ్చే కామెడీ చిత్రంతో సారా బాలీవుడ్‌లోకి అడుగుపెట్టనుంది. 2017 మార్చిలో ప్రారంభమయ్యే ఈ చిత్రాన్ని కరణ్ జోహార్ నిర్మాణ సంస్థ ధర్మ ప్రొడక్ష‌న్‌ తెరకెక్కించనుంది.

2017లో కరణ్ జోహార్ సారథ్యంలో తెరకెక్కించే చిత్రంలో హృతిక్‌రోష‌న్‌, దీపికా పదుకుణే నటిస్తారంటూ రెండు రోజుల క్రితం సూపర్ సినిమా పత్రిక వెల్లడించింది. దీనికి హృతిక్‌ కూడా తన కాల్షీట్లు కేటాయించాడు. దీపిక మాత్రం సంజయ్‌ లీలా బన్సాలీ చిత్రం రాణీ పద్మావతి తర్వాతే ఇందులో పాల్గొంటానని చెప్పడంతో అవకాశం సారాను వరించింది.

కరణ్ మల్హోత్రా 2015లో తెరకెక్కించిన యాక్షన్-డ్రామా బ్రదర్స్ మంచి విజయం సాధించింది. అక్షయ్ కుమార్, సిద్ధార్థ మల్హోత్రా, జాక్విలినా ఫెర్నాండేజ్‌లు ఈ చిత్రంలో నటించారు.