తండ్రి కాబోతున్న సల్మాన్ ఖాన్..?!

సల్మాన్ ఖాన్ తండ్రి కాబోతున్నాడు.. అంటే, వయసుతో ముదిరిపోయినా.. అతడికి ఇంకా పెళ్లే కాలేదు, అలాంటిది తండ్రి కాబోవడం ఏమిటి? అనే సందేహం రాకమానదు. నిజమే, సల్లూకు ఇంకా పెళ్లి కాలేదు. ఇప్పుడప్పుడే చేసుకునే అవకాశాలు కూడా కనిపించడం లేదు. కానీ.. అతడు తండ్రి కాబోతున్నాడు అనే మాట మాత్రం గట్టిగా వినిపిస్తోందిప్పుడు. అదెలా? అంటే.. చాలా మంది బాలీవుడ్ వాళ్ల తరహాలోనే! అదేనండీ.. సరోగసి పద్ధతిలో.

ఇప్పటికే పలువురు సినిమా వాళ్లు సరోగసి పద్ధతిలో పిల్లలను పొందిన సంగతి తెలిసిందే. తయారు చేస్తే ఈ జాబితా పెద్దదే అవుతుంది. ఈ జాబితాలోకే సల్మాన్ కూడా చేరబోతున్నాడట. తాజాగా సల్మాన్ ఒక ఇంటర్వ్యూలో చేసిన వ్యాఖ్యానాలను బట్టి ఈ మాట వినిపిస్తోంది.

మీడియా ప్రతినిధి సల్మాన్ పెళ్లి ప్రస్తావన తేగా.. ‘నేను మంచి భర్తను కాలేకపోతున్నాను. మంచి తండ్రిని అయినా అవుతానేమో..’ అని సల్మాన్ వ్యాఖ్యానించాడు. మరి పెళ్లి చేసుకుంటాను అని చెప్పని సల్మాన్ ఖాన్, తండ్రిని అవుతాను అన్నట్టుగా మాట్లాడటంతో సల్మాన్ కూడా సరోగసి పద్ధతిలో సంతానాన్ని పొందుతాడేమో అనే ఊహాగానాలు వ్యక్తం అవుతున్నాయి. మరి ఈ విషయం గురించి సల్మానే వివరణ ఇవ్వాలిక!