సల్మాన్ 'ట్యూబ్‌లైట్' టీజర్, ట్రైలర్ డీటేల్స్

సల్మాన్ ఖాన్ నటించే సినిమాలు సాధారణంగా అతడి అభిమానులకి ఈద్ కానుకగా రిలీజవుతాయనే సంగతి తెలిసిందే. అదే విధంగా సల్మాన్ ఖాన్ హీరోగా నటిస్తున్న లేటెస్ట్ మూవీ 'ట్యూబ్‌లైట్' కూడా ఎప్పటిలాగే ఈ ఏడాది ఈద్‌కి రిలీజ్ కానుంది. అయితే, ఓవైపు రిలీజ్ డేట్ సమీపిస్తున్నప్పటికీ.. ఇప్పటివరకు ట్యూబ్‌లైట్ సినిమాకు సంబంధించిన ఒక్క టీజర్ కానీ లేదా ట్రైలర్ కానీ రిలీజ్ చేయలేదు ఆ సినిమా డైరెక్టర్ కబీర్ ఖాన్.

తాజాగా ఇదే విషయంపై స్పందించిన కబీర్ ఖాన్... సినిమా విడుదలకన్నా నెలల తరబడి ముందునుంచే ప్రమోషన్స్‌తో హడావుడి చేయడం తనకి ఇష్టం వుండదని తెలిపాడు. అందుకే ఇప్పటివరకు ఏదీ రిలీజ్ చేయలేదు కానీ ఇక టైమ్ దగ్గరపడుతోంది కనుక ఏప్రిల్ చివర్లో టీజర్ రిలీజ్ చేసి, మే నెలలో ట్రైలర్ రిలీజ్ చేయాలని అనుకుంటున్నట్టు తన ప్లాన్ ఏంటో వివరించాడు కబీర్ ఖాన్. 'సల్మాన్‌తో 'ఏక్ థా టైగర్', 'బజ్రంగీ భాయిజాన్' వంటి బ్లాక్‌బస్టర్ చిత్రాల్ని డైరెక్ట్ చేసిన దర్శకుడు కావడంతో సల్మాన్ ఖాన్‌ని 'ట్యూబ్‌లైట్'లో ఎలా ప్రజెంట్ చేస్తాడో చూడాలి' అని ఆ ఇరువురి అభిమానులు వేచిచూస్తున్నారు.