Shaakuntalam Trailer: స్వతంత్ర నిర్ణయాలతో సమంతకు సమస్యలు.. ఎమోషనల్‌గా శాకుంతలం ట్రైలర్!

సీనియర్ డైరెక్టర్ గుణశేఖర్ (Gunasekhar) ప్రతిష్టాత్మంగా రూపొందించిన చిత్రం ‘శాకుంతలం’ (Shaakuntalam). శకుంతలగా సమంత (Samantha) టైటిల్ రోల్ పోషించిన ఈ చిత్రాన్ని గుణ టీమ్ వర్క్స్ పతాకంపై నీలిమ గుణ, దిల్ రాజు నిర్మించారు. శకుంతల, దుష్యంతుల ప్రేమకథగా తెరకెక్కిన ఈ మైథలాజికల్ మూవీలో దుష్యంతుడి పాత్రలో మలయాళ నటుడు దేవ్ మోహన్ (Dev Mohan) కనిపించనున్నారు. ఇప్పటికే వీఎఫ్‌ఎక్స్ కారణంగా పలుమార్లు వాయిదాపడ్డ ఈ చిత్రం ఎట్టకేలకు ఏప్రిల్ 14న ప్రపంచవ్యాప్తంగా విడుదలకు సిద్ధమైంది. ఈ క్రమంలోనే తాజాగా శాకుంతలం మూవీ నుంచి రిలీజ్ ట్రైలర్‌ను (Shaakuntalam Trailer) విడుదల చేశారు మేకర్స్. 1.34 నిమిషాల నిడివి గల ఈ ట్రైలర్‌లో చూపించిన సీన్లతో సినిమా ఎలా ఉండబోతుందన్న అంశంపై ప్రేక్షకులకు ఒక అంచనా క్రియేట్ చేయగలిగారు.దుష్యంతుడు, శకుంతల మధ్య పరిచయం, ప్రేమ సన్నివేశాలతో ట్రైలర్ ప్రారంభం కాగా.. విశ్వామిత్రుడు శకుంతలపై కన్నెర్రజేయడంతో కథ మలుపు తిరుగుతుంది. ఆ తర్వాత ప్రేమ జంట మధ్య మనస్పర్థలు ఏర్పడి దూరమైనట్లు చూపించగా.. ఇదే క్రమంలో సమంత గర్భవతిగా ఉండి కష్టాలు పడుతుంది. ఈ సందర్భంగానే ‘స్వతంత్రంగా నిర్ణయాలు తీసుకుని ఇంత వరకు తెచ్చుకున్నావు. ఫలితం అనుభవించాల్సిందే’ అని దుష్యంతుడు చెప్పే డైలాగ్ క్యూరియాసిటీని పెంచుతుంది. మొత్తానికి ఈ ప్రేమ జంట ఎడబాటును భావోద్వేగభరితంగా చూపించగా.. అసలు విడిపోయేందుకు కారణం ఏంటి? అనేది తెలియాలంటే సినిమా చూడాల్సిందే.

లీడ్ పెయిర్‌గా సమంత, దేవ్ మోహన్.. నటన ఆకట్టుకుంది. ఇక సాంకేతిక అంశాల విషయానికొస్తే.. గ్రాండ్ విజువల్స్, మణిశర్మ బ్యాక్‌ గ్రౌండ్ స్కోర్ అదనపు ఆకర్షణగా నిలిచాయి. కాగా.. ఈ చిత్రంలో అదితి బాలన్, ప్రకాష్ రాజ్, గౌతమి, మధు, సచిన్ ఖేడ్కర్, అనన్య నాగళ్ల, కబీర్ బేడీ, జిషు సేన్‌ గుప్తా, అల్లు అర్హ కీలక పాత్రల్లో నటించారు. ఈ మూవీ 2D, 3D వెర్షన్స్‌లో ఏప్రిల్ 14 నుంచి ప్రేక్షకుల ముందుకు రానుంది.

• Read latest Tollywood updates and Telugu News