పెళ్లయిన వెంటనే షూటింగ్‌కి రెడీ అయిన సామ్

పెళ్లి చేసుకున్న తర్వాత కూడా ఎక్కువ గ్యాప్ తీసుకోకుండానే మళ్లీ సినిమాల్లో బిజీ అవుతానని ముందుగా చెప్పినట్టుగానే నడుచుకుంటోంది సమంత. పెళ్లి అవగానే హనీమూన్ ట్రిప్స్ లాంటివేవీ ప్లాన్ చేయకుండా ముందుగా ఇచ్చిన కమిట్‌‌మెంట్స్‌కే అధిక ప్రాధాన్యత ఇచ్చింది సమంత. అందుకే రేపటి నుంచే మహానటి రెగ్యులర్ షూటింగ్‌లో జాయిన్ అయ్యేందుకు రెడీ అయ్యింది సమంత. తనని నమ్ముకున్న నిర్మాతలని పెళ్లి పేరుతో డేట్స్ అటు ఇటు చేసి ఇబ్బంది పెట్టకూడదనేది సమంత ఆలోచనట. అందుగురించే ఏది ఏమైనా ముందుగా ఇచ్చిన డేట్స్ ప్రకారమే సినిమాలని పూర్తి చేయాలని భావిస్తోందట ఆమె. అలా అయితేనే, సదరు నిర్మాతలు సైతం అనుకున్న తేదీకి తమతమ చిత్రాలని రిలీజ్ చేసుకోగలరు. లేదంటే కష్టమే కదా అనేది సామ్ అభిప్రాయం.

పెళ్లయిన వెంటనే ముందుగా రాజు గారి గది 2 ప్రెస్ మీట్‌లో పాల్గొన్న సమంత ఆ తర్వాత మహానటి షూట్‌కి రెడీ అయ్యింది. వచ్చే వారం తమిళంలో విజయ్ సరసన సామ్ నటించిన మెర్సల్ రిలీజవుతోంది. తెలుగులో 'అదిరింది' పేరిట రిలీజ్ కానున్న ఈ సినిమా ప్రమోషన్స్‌లోనూ సమంత పాల్గొనాల్సి వుంటుంది. ఆ తర్వాత రామ్‌చరణ్ సరసన రంగస్థలం సినిమా షూటింగ్ ఎలాగూ వుండనే వుంది. పాపం సామ్‌కి తీరిక లేనంత బిజీ.