షూటింగ్‌లో గాయపడిన సంజయ్ దత్!

మున్నాభాయ్ సంజయ్ దత్ షూటింగ్‌లో గాయపడ్డాడు. సంజయ్ దత్ జైలు నుంచి విడుదలైన అనంతరం అతడు ప్రధాన పాత్రలో తెరకెక్కుతున్న మొదటి చిత్రం భూమి. ముంబైలో జరుగుతున్న ఈ సినిమా షూటింగ్‌లోనే సంజయ్‌కి గాయాలయ్యాయి. క్రమం తప్పకుండా షూటింగ్‌లో పాల్గొంటున్న సంజయ్ దత్‌కి చేతి ఎముక ఫ్రాక్చర్ అయినట్టుగా ఆ చిత్రాన్ని డైరెక్ట్ చేస్తోన్న ఒమంగ్ కుమార్ తెలిపారు.

ప్రస్తుతం సంజయ్ విశ్రాంతి తీసుకుంటున్నప్పటికీ, మార్చి నెలాఖరులోగా షెడ్యూల్ ప్రకారం పూర్తి కావాల్సి వున్న భాగాన్ని వాయిదా వేయకుండా షూటింగ్ కానిచ్చేయాలని సంజయ్ దత్ పట్టుదలతో వున్నారని 'భూమి' యూనిట్ వర్గాలు పీటీఐకి తెలిపినట్టు సమాచారం.

తండ్రీ, కూతుళ్ల మధ్య జరిగే ఓ రివెంజ్ డ్రామాగా తెరకెక్కుతున్న ఈ చిత్రంలో సంజయ్ కూతురి పాత్రలో హైదరాబాదీ నటి అదితి రావ్ హైదరి నటిస్తుండగా, శరద్ కేల్కర్ విలన్ పాత్ర పోషిస్తున్నాడు. సంజయ్ దత్ కమ్‌బ్యాక్ మూవీగా రిలీజవుతున్న ఈ చిత్రం ఆగస్టు 4న రిలీజ్ కానుంది.