తన బయోగ్రఫీ పేరుతో.. ఒక రచయిత ఇష్టానుసారం ఒక పుస్తకాన్ని రాయడం పట్ల మండిపడుతున్నాడు బాలీవుడ్ స్టార్ హీరో సంజయ్ దత్. ఈ విషయంలో సీరియస్ గా ఉన్న దత్.. దీనిపై సదరు రచయితకూ, పబ్లిషర్లకు లాయర్ నోటీసులు పంపుతున్నట్టుగా ప్రకటించారు. ఒక వార్తా సంస్థ ఇస్తున్న సమాచారం ప్రకారం.. యాసిన్ ఉస్మాన్ అనే రచయిత సంజయ్ దత్ బయోగ్రఫీ అంటూ ఒక పుస్తకంతో వార్తల్లోకి వచ్చాడు. అందులో అత్యంత వివాదాస్పద అంశాలను ప్రస్తావించాడు.
ప్రత్యేకించి దత్ డ్రగ్స్ వాడకం విషయంలో, నాటి స్టార్ హీరోయిన్ మాధురీ దీక్షిత్ తో ఎఫైర్ వ్యవహారంపై సంచలన విషయాలను రాశాడు సదరు రచయిత. సంజయ్ దత్ డ్రగ్స్ వాడాడు అని, అలాగే మాధురీ దీక్షిత్ తో దత్ కు ఎఫైర్ ఉండేదని.. ఆమెను అతడు చాలా ప్రేమించాడని, అతడి ప్రేమకు మాధురీ కూడా ఓకే చెప్పిందని సదరు రచయిత తన పుస్తకంలో పేర్కొన్నాడు. సినిమా సెట్స్ మీదే మాధురికి దత్ ప్రపోజ్ చేశాడని, దత్ ను మాధురీ కూడా చాలా ఇష్టపడేదని పేర్కొన్నాడు.
మాధురి కోసమే దత్ తన మొదటి భార్యకు విడాకులు ఇచ్చినట్టుగా రచయిత రాయడం వివాదాస్పదంగా మారింది. దత్ విడాకులు ఇవ్వడంతో ఆయన మొదటి భార్య కుంగిపోయి, క్యాన్సర్ మరింత తీవ్రమై చనిపోయిందని ఉస్మాన్ పేర్కొన్నాడు. ఇలా మాధురి పిచ్చిలో పడి దత్ తన భార్యను చంపుకున్నడనే వ్యాఖ్యానాన్ని చేశాడు ఆ రచయిత.
ప్రస్తుతం దత్ తన మూడో భార్యతో కలిసి ఉన్నాడు. వీళ్లకు పిల్లలు కూడా ఉన్నారు. ఇక మాధురి కూడా తన వైవాహిక జీవితంతో ఆనందంగా ఉంది. ఇలాంటి సమయంలో.. సదరు రచయిత ఇలాంటి పుస్తకం రాయడం సంచలనంగా మారింది. దీంతో దత్ ఆగ్రహంతో ఉన్నట్టుగా తెలుస్తోంది. 90లలో సినిమా మ్యాగజైన్లలో వచ్చే గాసిప్స్ ను కలగలపి ఈ పుస్తకాన్ని రాశారని... తన అనుమతి కూడా లేకుండా ఇలా రాయడం పట్ల దత్ మండిపడుతున్నాడని, లాయర్ నోటీసులు పంపి.. వాళ్లను కోర్టుకు లాగడానికి సన్నద్ధం అవుతున్నాడని తెలుస్తోంది.