‘పద్మావతి’ షూటింగ్ ఆపేసిన భన్సాలీ

ప్రముఖ బాలీవుడ్ దర్శకుడు సంజయ్ లీలా భన్సాలీ తన షూటింగ్ సెట్లోనే దాడికి గురయ్యారు. జైపూర్లో షూటింగ్ జరుగుతుండగా రాజ్ పుట్ కర్ణి సేన సభ్యులు నినాదాలు చేస్తూ వచ్చి అతనిపై దాడి చేశారు. ఆ ఘటన భన్సాలీని తీవ్రంగా మానసిక వేదనకు గురి చేసినట్టు తెలుస్తోంది. అందుకే ఆయన పద్మావతి షూటింగ్ మధ్యలోనే ఆపేసి, ముంబై తిరుగుపయనమయ్యారట. భన్సాలీకి బాలీవుడ్ అంతా అండగా నిలిచింది. ప్రియాంకా చోప్రా, హృతిక్ రోషన్, కరణ్ జోహార్, అలియాభట్, ఫరా ఖాన్ వీరంతా భన్సాలీకి మద్దతుగా ట్వీట్లు చేశారు. రాజస్థాన్ ప్రభుత్వం కూడా ఘటనపై విచారణకు ఆదేశించింది.

రాణి పద్మావతి కథను భన్సాలీ తెరకెక్కిస్తున్నారు. జైపూర్లో జయ్‌ఘర్ కోటలో సెట్స్ వేసి సినిమా షూటింగ్ చేస్తుండగా కర్ణి సేన సభ్యులు దాడి చేశారు. చరిత్రను వక్రీకరించేలా సినిమా తీస్తున్నారని, పద్మావతి దేవిని అవమానించేలా సీన్లు చిత్రీకరిస్తున్నారని కర్ణి సేన సభ్యులు ఆరోపిస్తున్నారు.