సర్కార్ 3 ఫస్ట్‌లుక్ వచ్చేసింది

వివాదాస్పద డైరెక్టర్ రామ్‌గోపాల్ వర్మ మరోసారి తనదైన మార్క్ చిత్రంతో ప్రేక్షకుల ముందుకు రానున్నారు. బాలీవుడ్ బిగ్ బీ అమితాబ్ బచ్చన్ ప్రధాన పాత్రలో రూపొందుతున్న ‘సర్కార్ 3’ సినిమాకి సంబంధించిన ఫస్ట్‌లుక్‌ను రామ్‌గోపాల్ వర్మ సోషల్ మీడియా ద్వారా సోమవారం విడుదల చేశారు. బాలీవుడ్‌లో ట్రెండ్ సెట్ చేసిన సర్కార్ సినిమా అమితాబ్‌తో పాటు వర్మకి మంచి పేరు తీసుకొచ్చింది. అయితే ఇప్పటి వరకు సర్కార్‌గా అమితాబ్ ప్రదర్శించిన ఆహార్యం.. ఈ సినిమాలో రెట్టింపవుతుందని వర్మ వెల్లడించారు

తమిళనాడు దివంగత ముఖ్యమంత్రి జయలలిత ప్రియసఖి శశికళపై సినిమా తీస్తానని ఇటీవల ప్రకటించిన వర్మ.. సర్కార్‌ని ఏప్రిల్ 7న విడుదల చేయనున్నట్లు తెలిపారు. దీంతో శశికళ కథాంశంతో సినిమా ఆ తర్వాతే పట్టాలెక్కనుందని తెలుస్తోంది. గత కొంతకాలంగా వివాదాస్పద అంశాల్నే కథగా ఎంచుకుంటూ రామ్‌గోపాల్ వర్మ సినిమాలు తీస్తున్న విషయం తెలిసిందే.