అందుకే నేను హిమాలయాలకి వెళ్తుంటాను -రజినీకాంత్

శంకర్ డైరెక్షన్‌లో తెరకెక్కుతున్న సైన్స్ ఫిక్షన్ ఎంటర్‌టైనర్ 2.0 మూవీ షూటింగ్‌తో బిజీగా వున్న తమిళ సూపర్ స్టార్ రజినీకాంత్ తాజాగా ఆధ్యాత్మికత గురించి అనేక విషయాలు, అభిప్రాయాలు వెల్లడించారు. శ్రీశ్రీ పరమహంస యగొద స్థాపించిన యగొద సత్సంగ సొసైటీ 100వ వార్షికోత్సవం సందర్భంగా శనివారం జరిగిన ఉత్సవాల్లో పాల్గొన్న రజినీకాంత్.. తాను ఎప్పుడూ ఆధ్యాత్మికంగా గడపడానికే ఇష్టపడతాను అని అన్నారు. ఐశ్వర్యం కన్నా, అన్నింటికన్నా ఎక్కువగా తాను ఆధ్యాత్మికతనే ఇష్టపడతానంటున్న రజినీ... అది తనకు అమితమైన శక్తిని ఇస్తుందని తేల్చిచెప్పారు.

నా మొదటి గురువు నా సోదరుడు సత్యనారాయణ. నా మొదటి ఆధ్యాత్మిక గురువు సచ్చిదానంధర్. అతడి మృతి తర్వాత నేను అనేకమంది గురువులని అనుసరించాను. రాఘవేంద్ర స్వామి నుంచి భక్తిని ఒంటపట్టించుకున్న తాను... రమణ మహర్షి నుంచి అసలు తానెవరిని అని తెలుసుకునే పనిలో పడినట్టు వెల్లడించారు. పరమహంస యోగానంద ఆటోబయోగ్రఫీ నాపై చాలా ప్రభావం చూపించింది. ఆధ్యాత్మికాన్వేషణలో నా ప్రయాణం కొనసాగుతూనే వుంటుంది అని తెలిపారు.

అయితే, మీరు తరచుగా ఎందుకని హిమాలయాలకి వెళ్తుంటారు అని ఆ ఉత్సవాలకి హాజరైన ఓ ఆధ్యాత్మికవేత్త అడిగిన ప్రశ్నకు స్పందిస్తూ... " అక్కడి ఎవరెస్ట్ పర్వతంలో చాలా చాలా రహస్యాలున్నాయని, ఆ పవిత్రమైన రహస్యాల అన్వేషణ కోసమే తాను అక్కడికి వెళ్తుంటాను" అని రజినీ సమాధానం ఇచ్చినట్టు సమాచారం.