రజనీ నిమిరిన ‘కాలా’ కుక్క ధర రూ. కోట్లు..!

సూపర్ స్టార్ రజనీకాంత్ క్రేజ్‌ గురించి ప్రత్యేకంగా చెప్పనవసరం లేదు. అతని సినిమా వస్తుందంటే చాలు.. అభిమానుల్లో ఎక్కడ లేని ఉత్సాహం వచ్చేస్తుంటుంది. తాజాగా ఆయన నటించిన ‘కాలా’ సినిమా ఏప్రిల్ 27న విడుదల కాబోతుండగా.. ఇప్పటికే విడుదలైన టీజర్‌ సినిమాపై అంచనాల్ని పెంచుతోంది.

కాలా సినిమాకి సంబంధించిన ఓ ఆసక్తికరమైన అంశం ఇప్పుడు సోషల్ మీడియాలో హల్‌చల్ చేస్తోంది. అదేటంటే సినిమా పోస్టర్స్‌లో రజనీకాంత్ పక్కన ఠీవీగా నిల్చొన్న కుక్క (మణి‌) ధర ఇప్పుడు రూ. కోట్లలో పలుకుతోందట. చాలా మంది రజనీకాంత్ వీరాభిమానులు దాన్ని దక్కించుకునేందుకు ఆసక్తి కనబరుస్తున్నా.. అమ్మేందుకు మాత్రం దాని ట్రైనర్ సిమన్ ఒప్పుకోవడం లేదు. సినిమా వాళ్లకి అవసరమైనప్పుడు కుక్కల్ని సమకూర్చడం మణి వృత్తి.

‘చెన్నైలోని ఓ రోడ్డుపై నాకు ఆ కుక్క దొరికింది. దానికి ముద్దుగా మణి అని పేరు పెట్టుకుని పెంచాను. కాలా సినిమా కోసం ఓ కుక్క కావాలని దర్శకుడు రంజిత్ నా దగ్గరికి వచ్చాడు. ఆయన చాలా కుక్కల్ని పరిశీలించిన తర్వాత.. చివరికి మణిని ఎంపిక చేశాడు. షూటింగ్‌లో రజనీకాంత్ కూడా మణిని చాలా ప్రేమగా చూసుకున్నారు. ఇప్పుడు మణిని మాకు అమ్మేయండి.. రూ. కోట్లలో ఇస్తాం అంటున్నారు. కానీ.. ఓ బిడ్డలా దాన్ని పెంచుకున్నా.. అందుకే అమ్మలేను’ అని సిమన్ వెల్లడించాడు.