కమ్ముల కథ.. వెండితెరపైకి మరో సీఎం!

దర్శకుడు శేఖర్ కమ్ముల సినిమాలు నిజజీవితానికి కాస్త దగ్గరగా ఉంటాయి. ఆయన రాసుకునే కథల్లో మంచి కంటెంట్‌తో పాటు బలమైన సందేశం కూడా ఉంటుంది. ఇటీవల ‘ఫిదా’ అనే ప్రేమకథను తెరకెక్కించి బ్లాక్ బస్టర్ హిట్ అందుకున్న శేఖర్ కమ్ముల.. తన తదుపరి సినిమా కొత్త వారితో చేయబోతున్నారనే వార్తలు వినిపించాయి. అయితే తాజా సమాచారం ప్రకారం ఆయన ఓ సీఎం కథను సిద్ధం చేస్తున్నారని తెలుస్తోంది. గతంలో శేఖర్ కమ్ముల, రానా కాంబినేషన్‌లో రాజకీయ నేపథ్యమున్న ‘లీడర్’ సినిమాను వచ్చింది. ఈ సినిమాలో కుర్ర సీఎంను శేఖర్ కమ్ముల ప్రేక్షకులకు చూపించారు.

ఇప్పుడు ఓ సామాన్య కుర్రాడు వ్యవస్థను మార్చాలనే ఉద్దేశంతో ఒక్కో మెట్టు ఎక్కుతూ ముఖ్యమంత్రి పదవిని ఎలా చేరుకున్నాడు, అతడి ప్రయాణం ఎలా సాగిందనే విషయాలతో కథను సిద్ధం చేస్తున్నాడు శేఖర్ కమ్ముల. ఇటీవల విడుదలైన ‘నేనే రాజు నేనే మంత్రి’ కూడా పొలిటికల్ డ్రామానే. అలానే కొరటాల శివ-మహేష్ బాబు కాంబినేషన్‌లో వస్తున్న ‘భరత్ అనే నేను’ సినిమా కూడా రాజకీయ అంశాలతోనే తెరకెక్కుతోంది. ఈ సినిమాలో హీరో సీఎం అని తెలుస్తోంది. అయితే శేఖర్ కమ్ముల సీఎం స్టోరీ మాత్రం కాస్త భిన్నంగా కొత్తగా ఉంటుందని చెబుతున్నారు. ప్రస్తుతం సినిమాను స్క్రిప్ట్‌ను పూర్తి చేసే పనిలో పడ్డారు కమ్ముల. వచ్చే ఏడాది ఈ సినిమా సెట్స్ పైకి వెళ్ళే అవకాశాలు ఉన్నాయి. తారాగణం, టెక్నికల్ టీం తదితర విషయాలు తెలియాల్సి ఉంది.