అప్పట్లో అవకాశాల కోసం వేధించేవాళ్లు.. క్యాస్టింగ్ కౌచ్‌పై సీనియర్ నటి సంచలన కామెంట్స్..

హాలీవుడ్‌లో మొదలైన క్యాస్టింగ్ కౌచ్ ఉద్యమం భారత్‌లోని అన్ని ఇండస్ట్రీలకు పాకింది. అవకాశల కోసం లైంగిక వేధింపులకు గురయ్యామని కొందరు హీరోయిన్లు బహిరంగగా ప్రకటించి.. సంచలనానికి తెరలేపారు. ఆ తర్వాత ‘మీటూ’ పేరుతో సోషల్‌మీడియాతో ఓ ఉద్యమం ప్రారంభమై.. ఇండస్ట్రీలో ఎన్నో తెలియని చీకటి కోణాలను బయటపెట్టింది. బాలీవుడ్‌లో తను శ్రీ దత్తా ఈ ఉద్యమాన్ని ప్రారంభించగా.. టాలీవుడ్‌లో నటి శ్రీరెడ్డి ఈ ఉద్యమానికి ఊతమిచ్చింది.

అయితే అప్పట్లో తారాస్థాయిలో నడిచిన ఈ ఉద్యమం కొంతకాలనికి చల్లారింది. కానీ, ఇప్పటికీ ఎక్కడో ఒకచోట చాపకింద నీరులా పాకుతునే ఉంది. ఈ క్యాస్టింగ్ కౌచ్ గురించి తరచూ ఎవరో ఒకరు మాట్లాడుతున్నారు. తాజాగా సీనియర్ నటి.. అన్నపూర్ణమ్మ దీనిపై సెన్సెషనల్ కామెంట్ చేశారు. తన కెరీర్‌ ప్రారంభంలో ఎదురుకున్న కష్టాలను ఆమె పంచుకున్నారు.

ఇటీవల ఓ ఇంటర్వ్యూలో ఆమె మాట్లాడుతూ.. ‘‘అప్పట్లో కోసం అవకాశాల కోసం వేధించేవాళ్లు. అవకాశం ఇస్తే.. మరి మాకేంటి అని వెంటపడేవాళ్లు. అందుకే 20 ఏళ్లకే పెళ్లి చేసుకోవడం.. పాతికేళ్లకే అమ్మ పాత్రలు చేశాను. హీరోయిన్‌గా అవకాశాలు వచ్చినా.. కేవలం రెండు సినిమాలే చేశాను. అమ్మ పాత్రలు చేస్తే.. అలాంటివి ఉండవు. అప్పుడు కూడా అలాంటివి ఉండేవి.. కానీ ముందుగానే అలాంటివి వేధింపులు ఉండవని అగ్రిమెంట్ చేస్తేనే డేట్లు ఇచ్చేవాళ్లం’’ అని ఆమె తెలిపారు.

అయితే ప్రతీ రంగంలో క్యాస్టింగ్ కౌచ్ ఉంటుందని ఆమె అన్నారు. ‘‘ప్రతి రంగంలో ఈ సమస్య ఉంటుంది. కుటుంబ గౌరవాలను దృష్టిలో పెట్టుకొని మహిళలు లొంగకుండా ఉంటారు. సినీ పరిశ్రమలోనే మహిళలు అలాగే ఉండాలి’’ అని అన్నపూర్ణమ్మ అన్నారు. అయితే తప్పు అనేది ఎప్పుడు ఒకవైపు ఉండదని. ఇద్దరికి ఇష్టమైతేనే తప్పు జరుగుతుందని ఆమె కీలక వ్యాఖ్యలు చేశారు. అంతేకాక, అవకాశాల కోసం ప్రయత్నాలు చేసేవాళ్లకు మాత్రం ఇక్కడ కష్టాలు తప్పవని ఆమె తెలిపారు.