నాకు మళ్లీ న్యూ ఎంట్రీలా అనిపిస్తోంది: జయప్రద

చాలా గ్యాప్ తరువాత తనకు సినిమా చేయాలనే ఆశ పుట్టిందని, అయితే ఎలాంటి సినిమా చేయాలనే ఆలోచనలో ఉన్నప్పుడు దర్శకుడు నరసింహ చెప్పిన కథ నచ్చి నటించేందుకు అంగీకరించానని సీనియర్ నటి, ఒకప్పటి అందాల తార జయప్రద వెల్లడించారు. ఆకాష్ కుమార్, మిస్టి చక్రవర్తి హీరోహీరోయిన్లుగా ఏకేఎస్ ఎంటర్‌టైన్మెంట్ సమర్పణలో అశ్విన్ కుమార్ సహదేవ్ నిర్మించిన చిత్రం ‘శరభ’. ఎన్.నరసింహారావు దర్శకత్వం వహించారు. ఈ చిత్రంలో జయప్రద ప్రధాన పాత్ర పోషించారు. ఇటీవలే నిర్మాత దిల్ రాజు చేతుల మీదుగా విడుదలైన ఈ చిత్ర ట్రైలర్‌కు మంచి స్పందన లభించింది.

కాగా, ప్రస్తుతం పోస్ట్ ప్రొడక్షన్ దశలో ఉన్న ఈ చిత్రాన్ని జూన్ 1న ప్రపంచవ్యాప్తంగా విడుదల చేయనున్నట్లు నిర్మాత అశ్విన్ కుమార్ వెల్లడించారు. ఈ మేరకు జయప్రద సహా చిత్ర యూనిట్ మంగళవారం మీడియాతో మాట్లాడింది. ఈ సందర్భంగా జయప్రద మాట్లాడుతూ.. ‘నరసింహ చెప్పిన కథ విన్నాక సినిమా తప్పకుండా విజయం సాధిస్తుందని అనిపించింది. అందుకే అంగీకరించాను. చెప్పాలంటే ఈ చిత్రం నాకు మళ్లీ న్యూ ఎంట్రీలా అనిపిస్తోంది. నా రీఎంట్రీని ఓ మలుపు తిప్పే సినిమా అవుతుందని నమ్ముతున్నా. ఈ చిత్రంలో నా పాత్రలో చాలా వెరీయేషన్స్ ఉన్నాయి. ఓ రకంగా నాకు ఛాలెంజింగ్ పాత్ర’ అని చెప్పారు.

తనకు ఎన్ని భాషల్లో సినిమాలు చేసినా తెలుగులో సినిమా చేస్తే తెలుగు బిడ్డని అనే అనుభూతి కలుగుతుందని జయప్రద చెప్పుకొచ్చారు. దైవానికి-దెయ్యానికి మధ్య జరిగే సంఘర్షణే ‘శరభ’ చిత్ర కథాశమని, పెద్ద స్టార్ కాస్టింగ్‌తో చేసే సినిమాలా పెద్ద బడ్జెట్‌తో నిర్మాత ఈ సినిమాను నిర్మించారని చెప్పారు. మంచి చిత్రంతో మంచి టీమ్‌తో కలసి పనిచేయడం ఆనందంగా ఉందని జయప్రద తెలిపారు. ఈ చిత్రానికి ప్రముఖ సంగీత దర్శకుడు కోటి స్వరాలు అందించారు. నెపోలియన్, నాజర్, పునీత్, తనికెళ్ల భరణి, చరణ్ దీప్ ముఖ్యపాత్రలు పోషించారు. సాయి మాధవ్ బుర్రా డైలాగులు, రామ్-లక్ష్మణ్ ఫైట్లు మరో ప్రధాన ఆకర్షణ.