సెన్సార్‌ బోర్డ్‌పై ‘శరణం గచ్ఛామి’ రణం

భారత రాజ్యాంగంలో పొందుపరిచిన రిజర్వేషన్స్ , వాటి అమలు, ప్రజల్లో ఉన్న అపోహలను తొలగిస్తూ తీసిన ‘శరణం గచ్ఛామి’ సినిమా విడుదలకు సెన్సార్ బోర్డు అనుమతి ఇవ్వకపోవడం వివాదాస్పదంగా మారింది. ఈ చిత్రం విడుదలైతే సమాజంలో శాంతి, భద్రతల సమస్యలు తలెత్తే ప్రమాదం ఉందనే కారణంతో కేంద్ర ఫిలిం సెన్సార్ బోర్డు సర్టిఫికెట్ నిరాకరించింది.

హింస, అసభ్యత, అశ్లీలతలకు పెద్ద పీట వేస్తూ యువతను పెడ దారి పట్టించే సినిమాలకు క్లీన్ సర్టిఫికెట్స్ జారీ చేసే సెన్సార్ బోర్డ్.. యువతరాన్ని మేల్కొలుపుతూ.. మేధావులను సైతం ఆలోచింపజేస్తూ.. క్లీన్ ఎంటర్టైనర్‌గా రూపొందించిన తమ ‘శరణం గచ్ఛామి’ సినిమాను అడ్డుకోవడం తమకు ఆశ్చర్యాన్ని, ఆవేదనను కలిగిస్తోంద'ని అంటున్నారు చిత్ర నిర్మాత బొమ్మకు మురళి, దర్శకుడు ప్రేమ్ రాజ్.

సహేతుకమైన కారణాలు చూపకుండా.. రివైజింగ్ కమిటీకి వెళ్లమనడాన్ని తాము పూర్తిగా వ్యతిరేకిస్తున్నామన్నారు. తమ సినిమాకు న్యాయం జరిగే వరకు పోరాటం చేస్తామని తెలియజేశారు. అవసరమైతే సుప్రీంకోర్టుకు కూడా వెళ్లేందుకు సిద్దంగా ఉన్నామని దర్శకుడు తెలియజేశాడు.

బుధవారం హైదరాబాద్‌లోని ఐమాక్స్‌ థియేటర్‌లో ‘శరణం గచ్ఛామి’ రివ్యూ ప్రదర్శించారు. చిత్రాన్ని వీక్షించిన టీఆర్‌ఎస్‌ ఎమ్మెల్యే, తెలంగాణ సాంస్కృతి వేదిక చైర్మన్‌ రసమయి బాలకిషన్‌ ఈ చిత్రంలో ఎలాంటి వివాదాస్పద అంశాలను ప్రస్తావించలేదని.. ఈ సినిమాలో ఒక్క సీన్‌ని కూడా తొలగించాల్సిన అవసరం లేదంటూనే ఈ చిత్రానికి ప్రభుత్వం తరపున పన్నురాయితీ కల్పించాలని కోరుతూ సెన్సార్ బోర్డ్ వ్యవహరిస్తోన్న తీరుపై మండిపడ్డారు. అనంతరం జైభీమ్‌ యూత్‌ ఇండియా ఆధ్వర్యంలో‘శరణమా రణమా’ అనే కరపత్రాన్ని ఆవిష్కరించారు.

నవీన్ సంజయ్, తనిష్క్ తివారి, పరుచూరి వెంకటేశ్వరరావు, పోసాని కృష్ణమురళి, జయప్రకాష్ రెడ్డి, కాశీ విశ్వనాధ్, సుధ, సత్యకృష్ణ, దేశపతి శ్రీనివాస్, సుబ్బారాయశర్మ, బి.సి. సంఘ నాయకులు-శాసనసభ్యులు ఆర్.కృష్ణయ్య ముఖ్య తారాగణంగా ఈ సినిమాలో నటించారు.