రజనీ పార్టీ గుర్తు ఓ సీక్రెట్ సొసైటీ సింబల్!

తమిళ సూపర్‌ స్టార్‌ రజనీకాంత్‌పై నటుడు శరత్‌ కుమార్‌ మరోసారి విరుచుకుపడ్డారు. ఇటీవల రాజకీయాల్లోకి వస్తున్నట్లు ప్రకటించిన రజనీకాంత్‌ అవకాశవాద రాజకీయాలు చేస్తున్నారంటూ ధ్వజమెత్తారాయన. ‘ఆల్ ఇండియా సమతువ మక్కల్ కట్చి పార్టీ’ అధినేత అయిన శరత్‌ కుమార్‌ మంగళవారం నాడు జరిగిన పార్టీ సమావేశంలో రజనీకాంత్‌పై కీలక వ్యాఖ్యలు చేశారు

సినిమాల విడుదల సమయంలో ప్రచారం కోసం రజనీ రాజకీయాలను వాడుకుంటున్నారని అన్నారు. ఈ సందర్భంగా రజనీకాంత్ పొలిటికల్ పార్టీ గుర్తు గురించి మాట్లాడుతూ.. ఆయన చూపించే గుర్తు 'బాబా'ది కాదని... అది మేక తలకాయ అని ఎద్దేవా వేశారు. అది ఓ సీక్రెట్ సొసైటీకి చెందిన సింబల్ అంటూ ఘాటు వ్యాఖ్యలు చేశారు.

రాజకీయాల్లోకి ఎవరైనా రావచ్చని అయితే అవకాశవాద రాజకీయాలు చేసే నాయకులను ప్రజలు గమనిస్తూనే ఉంటారన్నారు. కావేరీ జలవివాదంలో తన వైఖరిని తేల్చకుండా రజనీకాంత్ దాటవేత దోరణితో వ్యవహరిస్తున్నారన్నారు. కాగా గతంలో జయలలిత ప్రభుత్వానికి భయపడి విదేశాలకు పారిపోయిన రజనీ కాంత్.. ఆ తరువాత కరుణానిధి ప్రభుత్వం అధికారం చేపట్టగానే తమిళనాడుకు వచ్చారన్నారు.

అయితే గతంలో కూడా రజనీపై ఇలాంటి వ్యాఖ్యలే చేశారు శరత్ కుమార్. రజనీ చెబుతున్న ఆధ్యాత్మికత, సెక్యులర్‌ విలువలేంటో రానున్న ఎన్నికల సమయంలో తెలుస్తుందని, అప్పుడే రజనీకాంత్ వెనకున్న రాజకీయ శక్తులు కూడా బయటకు వస్తాయంటూ తీవ్ర వ్యాఖ్యలు చేయడంతో రజనీ అభిమానులు ఆందోళనకు దిగారు. తాజాగా ఆయన చేసిన వ్యాఖ్యలు తమిళ రాజకీయ వర్గాల్లో మరోమారు దుమారం రేపేటట్లు ఉన్నాయి.
ఫైల్ ఫోటో: