‘బాహుబలి’ వేడిని ‘రాధ’ తట్టుకుంటాడా!

‘శతమానం భవతి’ వంటి జాతీయ అవార్డు సినిమాతో మంచి జోష్ మీద ఉన్న యువ హీరో శర్వానంద్ ఈ సమ్మర్‌లో సందడి చేయడానికి సిద్ధమయ్యాడు. శర్వానంద్ హీరోగా నటించిన ‘రాధ’ విడుదలకు సిద్ధమైంది. మే 12న ఈ సినిమా ప్రేక్షకుల ముందుకు వస్తోంది. అయితే ప్రస్తుతం తెలుగు తెరలపై ‘బాహుబలి ది కన్‌క్లూజన్’ దండయాత్ర కొనసాగిస్తోంది. ఇలాంటి సమయంలో ‘రాధ’ సినిమా విడుదలకు నిర్మాతలు ధైర్యం చేయడం సాహసమే అని చెప్పాలి.

అయితే ఈ సంక్రాంతికి వచ్చిన ‘శతమానం భవతి’ కూడా పెద్ద సినిమాల మధ్య విడుదలై ఘనవిజయం అందుకున్న విషయం తెలిసిందే. ‘ఖైదీ నంబర్ 150’, ‘గౌతమిపుత్ర శాతకర్ణి’ సినిమాలు ఉన్నా ఎలాంటి భయంలేకుండా దిల్ రాజు ‘శతమానం భవతి’ని విడుదల చేశారు. మంచి కుటుంబ కథా చిత్రంతో తెలుగు ప్రజల మనసు గెలుచుకున్నారు. ఇప్పుడు ‘రాధ’ సినిమాను నిర్మించిన బీవీఎస్ఎన్ ప్రసాద్, భోగపల్లి బాపినీడు ఇదే ధైర్యంతో ఉన్నారు.

‘రన్ రాజా రన్’, ‘ఎక్స్‌ప్రెస్‌ రాజా’, ‘శ‌త‌మానం భ‌వ‌తి’ వంటి వ‌రుస హిట్లతో దూసుకుపోతోన్న శర్వానంద్‌ను తెలుగు ప్రజలు తప్పకుండా ఆదరిస్తారని వీరు భావిస్తున్నారు. అందుకనే మే 12న విడుదల చేయాలని నిర్ణయించారు. సినిమా బాగుండాలే కానీ అది చిన్న సినిమా.. పెద్ద సినిమా.. అనే తేడా లేకుండా ఆదరిస్తామని ఇప్పటికే తెలుగు ప్రజలు నిరూపించారు. కాగా, ‘రాధ’లో శర్వానంద్ సరసన లావణ్య త్రిపాఠి, అక్ష పార్ధసాని నటిస్తున్నారు. ఈ సినిమాకు చంద్రమోహన్ దర్శకత్వం వహిస్తున్నారు.