రాజశేఖర్ కూతురు..ఆ సినిమాలో హీరోయిన్!

నటి జీవిత, నటుడు రాజశేఖర్ ల కూతురు శివానీ హీరోయిన్ గా ఎంట్రీ ఇచ్చే చిత్రం ఖరారు అయ్యింది. ఈమె హీరోయిన్ గా రాబోతోందని కొన్నాళ్లుగా ప్రచారం జరుగుతున్న సంగతి తెలిసిందే. ఈ నేపథ్యంలో ఇప్పుడు దాదాపు అధికారిక ప్రకటన వచ్చేసినట్టే. తొలి సారి అడవి శేష్ సరసన హీరోయిన్ గా నటించబోతోందట శివానీ.

ఆసక్తిదాయకమైన అంశం ఏమిటంటే.. ఆమె నటిస్తున్న సినిమా మరేదో కాదు.. ‘2 స్టేట్స్’ రీమేక్. రచయిత చేతన్ భగత్ రాసిన ‘2 స్టేట్స్’ నవలను ఆధారంగా చేసుకుని బాలీవుడ్ లో అదే పేరుతో సినిమా వచ్చింది. అక్కడ హిట్ కావడంతో ఆ సినిమాను తెలుగులో రీమేక్ చేస్తున్నారు.

ఈ రీమేక్ ప్రతిపాదన చాన్నాళ్లుగానే ఉంది. ఒక దశలో నాగచైతన్య, సమంత హీరోహీరోయిన్లుగా ఆ సినిమా రూపొందుతుందనే మాట వినిపించింది. అయితే ఇప్పుడు అడవి శేష్ హీరోగా, శివానీ హీరోయిన్ గా ఈ సినిమా రూపొందుతోందని తెలుస్తోంది. వెంకట్ కుంచెం దర్శకత్వంలో ఈ సినిమా రూపొందనుంది.