బాలకృష్ణను చంపేసిన వికీపీడియా

గూగుల్ తోడుంటే ప్రపంచం మీ చెంతే. మనకు ఏ సమాచారం కావాలన్నా క్షణాల్లో ఇట్టే తెలిసిపోతుంది. ఇక బుర్రలకు పెద్దగా పనిచెప్పాల్సిన అవసరం ఏముంది? అంతా గూగుల్ చూసుకుంటుందిలే అనుకుంటే ఇదిగో ఇలా తప్పులో కాలేయక తప్పదు. ఇంటర్నెట్ యుగంలో తరుచూ తప్పులు దొర్లటం అపుడప్పుడూ చూస్తూనే ఉన్నాం. తాజాగా నందమూరి నటసింహం బాలకృష్ణను చంపేసింది వికీపీడియా.
గూగుల్‌లో నందమూరి బాలకృష్ణ పేరుతో ఉన్న వికీపీడియాలో ఆయనకు సంబంధించిన పూర్తి సమాచారాన్ని పొందుపరిచారు. అయితే 23 ఏళ్ల క్రితమే అనగా.. 1995లోనే ఆయన మరణించినట్టుగా వికీపీడియాలో దర్శనం ఇస్తుంది. అంతేకాదు ఆయన బెంగుళూరులో మరణించినట్టుగా ప్లేస్ కూడా డిసైడ్ చేసేశారు. దీంతో బాలయ్య మరణ వార్త ప్రస్తుతం సోషల్ మీడియాలో వైరల్ అవ్వడంతో ఆయన ఫాన్స్‌కి ఆగ్రహంతో ఊగిపోతున్నారు. జరిగిన తప్పును సరిచేయకపోతే వికీపీడియా‌కి కూడా దబిడిదిబిడి తప్పదని ఫ్యాన్స్ నుండి హెచ్చరికలు రావడంతో వెంటనే పొరపాటును గ్రహించింది బాలయ్య డెత్ డేట్‌ను తొలగించారు. ఇంతకీ తప్పు ఎక్కడ జరిగిందంటే కన్నడ నటుడు టీఎన్ బాలకృష్ణ 1995లో మరణించారు. ఆయన సమాచారాన్ని పొరపాటున నందమూరి బాలకృష్ణ వికీపీడియాలో జతచేయడంతో వివాదం రేగింది.