'అడల్ట్' లవ్ స్టోరీలో శ్రియశరన్

దక్షిణాది భాషలన్నింటితోపాటు హిందీలోనూ గుర్తింపున్న హీరోయిన్ శ్రియశరన్. హిందీలో అజయ్ దేవ్‌గన్ సరసన చేసిన దృశ్యం మూవీ తర్వాత ఇప్పుడీ హాట్ అండ్ క్యూట్ లేడీ మరోసారి హిందీలో తన లక్ టెస్ట్ చేసుకోబోతోంది. ప్రకాష్ రాజ్ దర్శకత్వంలో తెరకెక్కనున్న తడ్కా అనే సినిమాలో బాలీవుడ్ నటుడు నానా పటేకర్ సరసన రొమాన్స్ చేయనుంది శ్రియ. ప్రస్తుతం గోవాలో ప్రకాష్ రాజ్‌తో కలిసి స్టోరీ సిట్టింగ్స్‌లో వున్న నానా పటేకరే స్వయంగా ఈ విషయాన్ని వెల్లడించాడు.
ఇప్పటికే తెలుగు, తమిళం, కన్నడ భాషల్లో రీమేక్ అయిన ఈ సినిమా మొదటిసారిగా మలయాళంలో వచ్చిన సాల్ట్ అండ్ పెప్పర్ అనే మూవీకి హిందీ రీమేక్. తడ్కా మూవీతో ప్రకాష్ రాజ్ మొదటిసారి బాలీవుడ్‌కి దర్శకుడిగా పరిచయం అవుతున్నాడు. ఇదే విషయంపై నానా పటేకర్ స్పందిస్తూ... ''హిందీలో ఎందుకు సినిమా చేయకూడదు' అని నేనే ప్రకాష్ రాజ్‌ని అడిగాను. అయితే, 'ఒకవేళ నేను హిందీ సినిమా డైరెక్ట్ చేస్తే అందులో హీరోగా మీరే నటించాల్సి వుంటుంది మరి' అని అన్నాడు ప్రకాష్ రాజ్. అందుకు నేను కూడా సరేనన్నాను. అలా ఈ సినిమా ప్లానింగ్ కుదిరింది. జీవితం అంతా ఒంటరిగానే బతికేసిన ఓ 50 ఏళ్ల వ్యక్తి లవ్ స్టోరీ ఇది. ఇందులో నానా పటేకర్ ఎంత రొమాంటిక్‌గా వుంటాడో మీరే చూస్తారు" అని అసలు విషయాన్ని చెప్పుకొచ్చాడు నానా పటేకర్.