సైమా ఫంక్షన్‌కి 100 మంది బిగ్ స్టార్స్

సౌతిండియన్ సినీపరిశ్రమ అంతా ఏకమై అత్యంత ప్రతిష్టాత్మకంగా నిర్వహించుకునే సినీ ఫెస్టివల్ సైమా అవార్డ్స్ వేడుకకి రంగం సిద్ధమైంది. క్రితంసారి దుబాయ్‌లో జరిగిన ఈ అందమైన వేడుక ఈసారి మరింత అందంగా ముస్తాబై మీ ముందుకు రానుంది. ఈ 5వ సైమా అవార్డ్స్ ఫంక్షన్‌కి సింగపూర్‌లోని సన్‌టెక్ కన్వెన్షన్ సెంటర్ వేదిక కానుంది. తెలుగు, తమిళ, కన్నడ, మలయాళం చిత్ర పరిశ్రమలకి చెందిన సినీ ప్రముఖులనంతా ఒకే వేదికపైకి తీసుకువచ్చే సైమా అవార్డ్స్ ఫంక్షన్‌లో నటీనటులు, సాంకేతిక నిపుణులని వారి ప్రతిభ ఆధారంగా సైమా అవార్డులతో సత్కరించడమే ఈ ఈవెంట్ ప్రత్యేకత.

జూన్ 30, జులై 1వ తేదీల్లో జరగనున్న సైమా వేడుక కోసం ఆడియెన్స్ మాత్రమే కాకుండా యావత్ సినీ ప్రముఖులు సైతం ఎంతో ఆత్రుతగా ఎదురు చూస్తున్నారు. ఈ ఈవెంట్‌కి సంబంధించిన ప్రకటన కోసం శుక్రవారం సింగపూర్‌లో నిర్వహించిన మీడియా సమావేశంలో శృతిహాసన్, రానా దగ్గుబాటి, యంగ్ మ్యూజిక్ కంపోజర్ అనిరుధ్ రవిచందర్, సైమా చైర్‌పర్సన్ బృందా ప్రసాద్‌లు పాల్గొన్నారు. దాదాపు 100 మంది బిగ్గెస్ట్ స్టార్స్ పాల్గొననున్న ఈ వేడుకల్లో అనిరుధ్ రవిచందర్, యశ్, రకుల్ ప్రీత్ సింగ్, సుధీర్ బాబు, హుమా ఖురేషీ, ఉషా ఉతుప్, నీరజ్ మాధవ్, ఐశ్వర్యా రాజేష్, దేవిక, రెజినా వంటి స్టార్స్ ఎంతో మంది తమ లైవ్ పర్‌ఫార్మెన్స్‌లతో ఆడియెన్స్‌ని అలరించనున్నారు.