అబ్బే.. బిగ్‌బాస్ గర్ల్‌ని పెళ్లి చేసుకోనన్న హీరో!

తమిళ బిగ్‌బాస్ లో పాల్గొని బాగా పాపులారిటీ సంపాదించుకున్న నటి ఓవియా. బిగ్‌బాస్ హౌస్ లో ఈమె చేసిన అల్లరి ఆ కార్యక్రమ వీక్షకులను బాగా ఆకట్టుకుంది. ఈమెకు ఫ్యాన్ ఫాలోయింగే ఏర్పడింది. అయితే అనూహ్యమైన తీరుతో బిగ్‌బాస్ హౌస్ నుంచి ఓవియా వైదొలిగే పరిస్థితి వచ్చిందని తెలుస్తోంది. హౌస్ నుంచి తనను బయటకు పంపించేయాలని అంటూ ఆత్మహత్య యత్నం చేయడం ఇది వరకటి ఎపిసోడ్స్ లో ప్రసారం అయ్యింది. అయితే తాజాగా ఆమె సూసైడ్ అటెంప్ట్ చేయడంతో ఆసుపత్రికి తరలించినట్టుగా వార్తలు వస్తున్నాయి.

ఆ సంగతలా ఉంటే.. ఓవియా విషయంలో తనపై అసత్య ప్రచారం జరుగుతోందని తమిళ స్టార్ హీరో శింబు ఒక ప్రకటన విడుదల చేశాడు. ఓవియా తనను బాగా ఆకట్టుకున్నట్టుగా, ఆమెను పెళ్లి చేసుకుంటాను అని తను వ్యాఖ్యానించినట్టుగా వస్తున్న వార్తల్లో నిజం లేదని శింబు స్పష్టం చేశాడు. టీవీల్లో, పత్రికల్లో, సోషల్ మీడియాలో అసత్యప్రచారం జరుగుతోందని శింబు పేర్కొన్నాడు.

ఓవియా తనకు బాగా నచ్చినట్టుగా, ఆమెను పెళ్లి చేసుకోవడానికి రెడీ అని శింబు అన్నట్టుగా ట్విటర్ లో ఒక పోస్టు ప్రచురితం అయ్యింది. అయితే ఆ ట్విటర్ అకౌంట్ తనది కాదని శింబు స్పష్టం చేశాడు. ఫేక్ అకౌంట్ నుంచి ఆ ట్వీట్ పోస్టు అయిన విషయాన్ని గ్రహించకుండా తనపై అబద్ధపు ప్రచారాన్ని చేస్తున్నారని శింబు ధ్వజమెత్తాడు. ఇలాంటి వార్తలను ప్రచారం చేసే ముందు కొంచెం ఆలోచించండి.. అని శింబు మీడియాకు హితబోధ చేశాడు.