బ్రేకప్ తర్వాత హీరోహీరోయిన్ల రొమాన్స్!

నయనతార, శింబు.. వీళ్లిద్దరూ ఎంత ఘాటైన ప్రేమికులో వివరించనక్కర్లేదు. ఇదంతా ఒకప్పుడు లెండి. ఎలా పడ్డారో కానీ ప్రేమలో పడి.. తెగ ప్రేమించేసుకున్నారు. ముద్దులు పెట్టుకుని, ఫొటోలు దిగి.. అవి మీడియా వరకూ వచ్చేంతగా ప్రేమించుకున్నారు. ఆ తర్వాత ఏమైందో కానీ వేరుపడ్డారు. బ్రేకప్ అనుకుని.. విడిపోయారు. శింబుతో బ్రేకప్ తర్వాత నయనతార ప్రభుదేవాతో ప్రేమలో పడింది. ఆ ప్రేమ పెళ్లి వరకూ వెళ్లి ఆగింది. ఆ తర్వాత అతడితో బ్రేకప్.. ఆపై దర్శకుడు విఘ్నేష్ తో ఆమె ప్రేమలో ఉన్నారిప్పుడు.

ఇక శింబు కథ విషయానికి వస్తే నయనతో బ్రేకప్ అనంతరం హన్సికతో ప్రేమలో పడ్డాడు. వీరిద్దరూ క్లోజ్ గా మూవ్ అయ్యారు. తర్వాత మళ్లీ బ్రేకప్.. ప్రస్తుతానికి శింబు సోలో. అయితే మాజీ ప్రేయసితో ఈ హీరో క్లోజ్ గా ఉండటం. ఆమె కూడా ఇతడితో కలిసి నటించడానికి వెనుకాడకపోవడమే విచిత్రమిక్కడ. బ్రేకప్ తర్వాత, నయనతార-శింబు కాంబోలో వచ్చిన సినిమానే ‘ఇదు నమ్మ ఆళు’. తమిళంలో ఏడాది కిందటే విడుదల అయిన ఈ సినిమా ఇప్పుడు తెలుగులోకి అనువాదమై విడుదల కానుంది.

తెలుగులో ‘సరసుడు’ పేరుతో ఈ సినిమా వస్తోంది. విడిపోయిన తర్వాత, వేర్వేరు వాళ్లతో ప్రేమలో పడిన తర్వాత శింబు, నయనతారలు కలిసి నటించిన రొమాంటిక్ సినిమాగా తమిళనాట ప్రచారాన్ని పొందింది ఇది. తెలుగులో కూడా అలాంటి ప్రచారమే పొందుతోంది. మరి ఈ మాజీ ప్రేమికుల తాజా ప్రేమకథ తెలుగులో ఏ మేరకు ఆకట్టుకుంటుందో చూడాలి.