'ధృవ' కోసం 'సింగం3' వాయిదా వేశాం!

సూర్య నటించిన సింగం-3 చిత్రం డిసెంబర్ 23న ప్రపంచవ్యాప్తంగా విడుదల కాబోతుంది. డిసెంబర్ 16న విడుదల కావాల్సిన ఈ సినిమా కొన్ని కారణాల వల్ల వాయిదా పడింది. అయితే సింగం-3 విడుదల వాయిదాకు సంబంధించి ఆసక్తికర విషయం బయటకు వచ్చింది. రాంచరణ్ నటించిన 'ధృవ' సినిమా కోసం సింగం-3 వాయిదా వేసినట్లు తెలిపారు. ధృవ సినిమా నిర్మాత అల్లు అరవింద్ తమ సినిమా ఒక వారం వాయిదా వేసుకోవాల్సిందిగా విజ్ఞప్తి చేశారని, ఆయన కోరిక మేరకు డిసెంబర్ 23వ తేదీకి వాయిదా వేసినట్లు సింగం3 సినిమా యూనిట్ సభ్యుల నుండి తెలిసింది. కాగా, రాంచరణ్ 'ధృవ' సినిమా డిసెంబర్ 9న విడుదల కాబోతున్న విషయం తెలిసిందే.



ఇక సింగం-3 విషయానికి వస్తే ఈరోజు ఈ సినిమా ఆడియో విడుదల కావాల్సి ఉంది. సింగం-3 సాంగ్ వీడియో ప్రోమోస్ తాజాగా విడుదల చేశారు. హేరీస్ జయరాజ్ సంగీతం అందించారు. హరి దర్శకత్వంలో తమిళ, తెలుగు భాషల్లో తెరకెక్కిన సింగం-3పై ప్రేక్షకుల్లో భారీ అంచనాలున్నాయి. ఈ సినిమాలో సూర్య సరసన అనుష్క శెట్టి, శృతిహాసన్ హీరోయిన్లుగా నటిస్తున్నారు.