వేధింపుల కేసులో గజల్ శ్రీనివాస్ అరెస్ట్

ప్రముఖ గాయకుడు గజల్ శ్రీనివాస్‌ను లైంగిక వేధింపుల కేసులో పోలీసులు అరెస్ట్ చేశారు. తనను గజల్ శ్రీనివాస్ లైంగికంగా వేధించారని, ఓ మహిళ పంజాగుట్ట పోలీసులకు ఫిర్యాదు చేసింది. డిసెంబరు 29 న పోలీసులకు ఫిర్యాదు చేసిన బాధితురాలు, దీనికి సంబంధించిన ఆధారాలను సైతం పోలీసులకు అందజేసింది. దీంతో ఆయనపై పోలీసులు కేసు నమోదు చేసి మంగళవారం ఉదయం అదుపులోకి తీసుకున్నారు. బాధితురాలు ఆలయవాణి రేడియోలో జాకీగా పనిచేస్తున్నట్లు సమాచారం. వెంకటరమణ కాలనీలో నివాసముంటున్న మహిళను గాయకుడు శ్రీనివాస్‌ కొంతకాలంగా వేధిస్తున్నారని.. ఇటీవల అవి ఎక్కువ కావడంతో బాధితురాలు పోలీసులను ఆశ్రయించినట్లు సమాచారం.

అయితే తనపై చేస్తున్న ఆరోపణలు నిరాధారమైనవి, అందులో వాస్తవం లేదని పోలీసుల విచారణలో తెలిపారు. ఫిర్యాదు చేసిన రేడియో జాకీ తనకు తెలుసని గజల్ శ్రీనివాస్ అన్నారు. నా భుజానికి, కాళ్ల నొప్పులకు ఫిజియోథెరపీ జరుగుతోందని, సోమవారం ఫిజియోథెరపిస్ట్ రాకపోతే ఈ అమ్మాయి వచ్చి చేసిందని తెలియజేశారు. ఆమె తనపై ఇలా ఎందుకు ఫిర్యాదు చేసిందో అర్థంకావడం లేదని శ్రీనివాస్ వ్యాఖ్యానించారు.