MeToo: ‘లిప్‌లాక్ చేసి రాక్షసానందం పొందాడు’

అందరూ అనుకున్నట్లుగా కేవలం పనిచేసే ప్రదేశాల్లోనే కాదు.. సొంత ఇళ్లల్లో కూడా బాలికలు, మహిళలపై అఘాయిత్యాలు జరుగుతాయన్నారు సింగర్ సునితా సారథి. రంగాలతో సంబంధం లేకుండా లైంగిక వేధింపులు ఎదుర్కొన్న ఆడవాళ్లు ఒక్కొక్కరుగా తమకు ఎదురైన చేదు అనుభవాలను సోషల్ మీడియా ద్వారా బయటపెడుతున్నారు. ఈ క్రమంలో సింగర్ సునిత సైతం పలు దశలలో తనకు ఎదురైన లైంగిక వేధింపుల ఘటనలను వివరిస్తూ.. వీటి ద్వారా మరికొందరు మృగాళ్లు తప్పు చేసేందుకు వెనుకాడతారని చెప్పారు.

ఈ మేరకు ఫేస్ఋక్‌లో తనకు ఎదురైన వేధింపుల ఘటనలను వివరించారు. ‘అప్పుడు నాకు నాలుగైదేళ్లుంటాయి. మా అమ్మ వాళ్ల సోదరుడు తరచుగా మా ఇంటికి వచ్చేవాడు. వచ్చిన ప్రతీసారి బెడ్రూమ్‌లోకి తీసుకెళ్లి ముద్దులుపెట్టి, అసభ్యంగా తాకుతూ వేధించాడు. కొన్ని నెలలపాటు ఇలా జరిగింది. నన్ను ప్రేమగా చూసుకుంటున్నాడని ఇంట్లోవాళ్లు భావించేవారు. కానీ కొన్నేళ్ల తర్వాత ఆ మావయ్య చెడు ఆలోచన నాకు అర్థమై షాకయ్యాను.
ఈ క్రమంలో కొన్నేళ్ల తర్వాత మా అమ్మ సహోద్యోగి, స్నేహితుడు నన్ను వేధించాడు. మా ఇంటికి రాగానే నన్ను ఎత్తుకుని ఆడించినట్లు చేసి వికృత చేష్టలకు పాల్పడేవాడు. ఇష్టం వచ్చినట్లుగా ప్రవర్తిస్తాడని నేను ఆయనను అసహ్యించుకునేదాన్ని. ఓ రోజు మధ్యాహ్నం ఇంటికి వచ్చిన ఆ అంకుల్ నన్ను దగ్గరికి లాక్కుని లిప్‌లాక్ ఇచ్చేశాడు. వదిలించుకునేందుకు చూస్తుండగా నా ముఖంపై ముద్దులు పెడుతూ రాక్షసానందం పొందాడు. వెంటనే బాత్రూమ్‌కు వెళ్లి డెటాల్‌తో నోరు కడిగేసుకున్నా. ఇలా నా జీవితంలో రెండు చేదు అనుభవాలు ఎదురయ్యాయి.
Read also: MeToo సంబంధిత కథనాల కోసం క్లిక్ చేయండి

సింగర్ చిన్మయి నాకు స్నేహితురాలు కాదు. కానీ ఆమెకు జరిగినట్లే నాకు చేదు ఘటనలు జరిగాయి. మహిళలు ఒకరికొకరు పరస్పరం సాయం చేసుకోవాల్సిన తరుణం ఆసన్నమైంది. మీటూ ఉద్యమం (#MeToo) వల్ల నా బాధను చెప్పుకునే అవకాశం దొరికింది. నిజం నిర్భయంగా మాట్లాడాలి. వెకిలిగా ప్రవర్తించే వాళ్లకు భయపడవద్దు. మానవ మృగాలను కాపాడవద్దు. మగవాళ్లు కూడా మాకు మద్దతు తెలిపితే నీచులకు శిక్ష పడేలా చేయవచ్చునంటూ’ సింగర్ సునితా సారథి పోస్ట్ చేశారు.