Butta Bomma మూవీ రిలీజ్ వాయిదా.. 10 రోజుల ఆలస్యంగా థియేటర్లలోకి!

Butta bomma postponed : ఫస్ట్ పోస్టర్‌తోనే అందరి చూపు తనవైపు తిప్పుకున్న ‘బుట్టబొమ్మ’ (Butta Bomma) సినిమా రిలీజ్ వాయిదాపడింది. ప్రకటించిన షెడ్యూల్ ప్రకారం జనవరి 26న ఈ మూవీ థియేటర్లలోకి రావాల్సి ఉంది. కానీ.. స్పష్టమైన కారణాలు చెప్పకుండానే ఈ చిత్ర యూనిట్.. మూవీ రిలీజ్‌ని వాయిదా వేసుకుంది. ఫిబ్రవరి 4న వరల్డ్‌వైడ్‌గా ఈ సినిమాని రిలీజ్ చేయబోతున్నట్లు శనివారం ఒక పోస్టర్‌ని రిలీజ్ చేసింది. సూర్య వశిష్ట, అర్జున్‌ దాస్‌, అనిక సురేంద్రన్‌ ప్రధాన పాత్రలు పోషిస్తున్న ఈ సినిమాని సితార ఎంటర్‌టైన్‌మెంట్స్, పార్చూన్ ఫోర్ సినిమాస్ బ్యానర్‌పై నాగ వంశీ, సాయి సౌజన్య నిర్మించారు. వాస్తవానికి ఈ మూవీ మలయాళం సినిమా‘కప్పేలా’కి రీమేక్. ఈ విషయాన్ని చిత్ర యూనిట్ మొదట్లోనే చెప్పేసింది. అయితే.. పోస్టర్‌ని కూడా కాపీ కొట్టినట్లు నెటిజన్లు ఇటీవల సోషల్ మీడియాలో ఆరోపించారు. ‘ద ప్రెస్టేజ్‌’ మూవీ పోస్టర్‌కి మక్కీకి మక్కీగా ఈ బుట్టబొమ్మ పోస్టర్‌ని దింపేశారు. దాంతో ఓ రేంజ్‌లో ప్రొడ్యూసర్ నాగ వంశీని నెటిజన్లు ఆడేసుకున్నారు.

కేవలం నాగ వంశీనే వాళ్లు టార్గెట్ చేయడానికి మరో కారణం కూడా ఉంది. అది ఏంటంటే? గత ఏడాది చివర్లో రిలీజైన అవతార్ మూవీపై నాగ వంశీ నెగటివ్‌గా ట్వీట్ చేశారు. దాంతో ఆ కాపీ పోస్టర్‌ని చూపిస్తూ మొట్టికాయలు వేశారు. శౌరి చంద్రశేఖర్ దర్శకత్వం వహించిన బుట్టబొమ్మ సినిమా ప్రమోషన్స్‌ని కూడా ఇటీవల గట్టిగా చేశారు. మూవీలో నటించిన
సూర్య వశిష్ట, అర్జున్‌ దాస్‌, అనిక సురేంద్రన్‌ మీడియాకి స్పెషల్ ఇంటర్వ్యూలు కూడా ఇచ్చారు. కానీ సడన్‌గా రిలీజ్ వాయిదాపడింది. సోషల్ డ్రామాగా ఈ మూవీ తెరకెక్కింది.


Read Latest Telugu Movies News , Telugu News