శ్రీదేవిని ఇబ్బంది పెడుతున్న శివగామి

'బాహుబలి' సినిమాలో రాజమాతగా రమ్యకృష్ణ పోషించిన 'శివగామి' పాత్ర కోసం ముందుగా ఎస్ఎస్ రాజమౌళి వెళ్లి శ్రీదేవిని సంప్రదించిన సంగతి తెలిసిందే. అయితే ఆ పాత్రకి సైన్ చేయడానికి ఆమె కొన్ని కండిషన్స్ పెట్టడంతో అలా ఆ రోల్ ప్లే చేసే ఛాన్స్‌ రమ్యకృష్ణకి వచ్చింది. శివగామి పాత్రను రమ్యకృష్ణ చేస్తే ఎలా వుండేదో తెలీదు కానీ రమ్యకృష్ణ మాత్రం శివగామి అంటే రమ్యకృష్ణ... రమ్యకృష్ణ అంటేనే శివగామి అన్నంత గొప్పగా ఆ పాత్రలో జీవించి సినిమాకు ఓ హైలైట్‌గా నిలిచింది. ఇదే విషయమే ఇటీవల రాజమౌళి ఓ ఇంటర్వ్యూలో మాట్లాడుతూ.. శ్రీదేవి ఆ పాత్రను కాదనడమే తమ అదృష్టంగా భావిస్తున్నామని అన్నారు.

ఇదిలావుంటే, ప్రస్తుతం శ్రీదేవి ప్రధాన పాత్రలో బాలీవుడ్‌లో 'మామ్‌' అనే సినిమా రూపొందుతోంది. ముంబైలో నిన్న జరిగిన ఈ సినిమా ట్రైలర్ లాంచింగ్ ఈవెంట్‌కి హాజరైన శ్రీదేవిని అక్కడున్న మీడియా సైతం ఈ ప్రశ్న అడగనే అడిగింది. బాహుబలి 2 సినిమాలో శివగామి పాత్రకి ఎందుకు అంగీకరించలేదని అడిగారు అక్కడున్న ఫిలిం జర్నలిస్టులు. దీంతో వారికి ఏం సమాధానం చెప్పాలో అర్థం కాని శ్రీదేవి.. 'నో కామెంట్‌' అంటూ సమాధానం చెప్పడానికి నిరాకరించింది.

జులైలోనే 'మామ్‌' సినిమా విడుదల కానున్న నేపథ్యంలో ఇవాళ కాకపోతే ఇంకోసారైనా ఆమె పాల్గొనే ఏదో ఓ ప్రమోషన్ ఈవెంట్‌లోనైతే ఈ ప్రశ్నకి సమాధానం చెప్పక తప్పదు. కానీ అప్పటివరకైతే శివగామి గురించి శ్రీదేవి ఫీల్ కాక తప్పదేమో!