‘శ్రీనివాస కళ్యాణం’ తొలి పాట.. బాలు ఆలపించిన ఆణిముత్యం!

గాన గంధర్వుడు ఎస్పీ బాలసుబ్రహ్మణ్యం పాట వింటుంటే చెవిలో అమృతం పోసినట్టుగా ఉంటుంది. ఆయన స్వరంలో ఏదో తెలియని ఆకర్షణ. పాశ్చాత్య సంగీతంలో మునిగితేలుతున్న మనకు ఎస్పీబీ పాట వింటే ఓ మంచి తెలుగు పాట విన్నామనే భావన కలుగుతుంది. ఈ మధ్య కాలంలో బాలు పాడిన పాటలు చాలా తక్కువే. కానీ సంవత్సరానికి ఒకటి వచ్చినా అది ఆయన అభిమానులకు ఆనందమే. కిందటేడాది ‘శతమానం భవతి’ సినిమాలో ‘నిలవదే మది నిలవదే’ పాటను బాలు ఆలపించారు. ఆల్బమ్‌కే ఈ పాట హైలైట్‌గా నిలిచింది. ఇప్పుడు తాజాగా బాలు ఆలపించిన మరోపాట సంగీత ప్రియులను విపరీతంగా ఆకర్షిస్తోంది.

నితిన్, రాశీ ఖన్నా జంటగా ‘శతమానం భవతి’ ఫేం సతీష్ వేగేశ్న దర్శకత్వంలో తెరకెక్కుతున్న చిత్రం ‘శ్రీనివాస కళ్యాణం’. శ్రీ వెంకటేశ్వర క్రియేషన్స్ పతాకంపై దిల్ రాజు నిర్మిస్తున్నారు. సతీష్ వేగేశ్న-దిల్ రాజు కాంబినేషన్‌లో వస్తోన్న మరో కుటుంబ కథాచిత్రం ఇది. మిక్కీ జే మేయర్ సంగీతం అందించారు. ఈ చిత్రంలో తొలి పాటను సోమవారం విడుదల చేశారు. ఎస్పీ బాలసుబ్రహ్మణ్యం ఆలపించిన ఈ పెళ్లి పాట అద్భుతంగా ఉంది. ఈ పాట గురించి హీరో నితిన్ ట్వీట్ చేస్తూ.. ‘ఈ ఏడాది ఉత్తమ పెళ్లి పాట ఇది’ అని పేర్కొన్నాడు. ఆల్బమ్‌లో తనకెంతో ఇష్టమైన పాటని తెలిపాడు.
నిజమే.. ఈ పాట వింటే ఎవరికైనా అదే భావన కలుగుతుంది. ఇక ఇక్కడి నుంచి ప్రతి పెళ్లి సీడీలో ఈ పాట తప్పకుండా ఉంటుంది. శ్రీమణి అద్భుతమైన సాహిత్యం అందించారు. మిక్కీ జే మేయర్ మరోసారి వినసొంపైన సంగీతంతో కట్టిపడేశారు. సినిమా ప్రమోషన్‌కు ఈ ఒక్కపాట చాలు అనేట్టుగా ఉంది. మరి అంతగొప్ప పాటను మీరూ వినేయండి. అన్నట్టు ఈ సినిమా ఆగస్టు 9న విడుదలవుతోంది.