కమల్ ఓటమిపై శృతి రియాక్షన్.. ‘మిమ్మల్ని చూస్తుంటే ఎలా ఉందంటే’ అంటూ పోస్ట్

భారత దేశ చరిత్రలో చాలా మంది సినీ తారలు రాజకీయాల్లోకి వెళ్లి.. అక్కడా తమ సత్తా చాటారు. సొంతగా పార్టీలు పెట్టి ముఖ్యమంత్రులుగా ఎదిగిన వాళ్లు చాలా మందే ఉన్నారు. ముఖ్యంగా దక్షిణ భారతదేశంలో రాజకీయాల్లో సక్సెస్ అయిన సినీ తారల సంఖ్య ఎక్కువగానే ఉంది. అయితే సినిమాల్లో నుంచి రాజకీయాల్లోకి వెళ్లి చేతులు కాల్చుకున్న వాళ్లు తక్కువేమీ లేరు. తాజాగా యూనివర్సల్ హీరో కమల్ హాసన్‌కు ఇలాంటి అనుభవమే ఎదురైంది. తమిళనాడు శాసనసభ ఎన్నికల ఫలితాల్లో కమల్‌ ఓటమిపాలయ్యారు.

2018లో ‘మక్కల్ నీది మయ్యం’ పేరుతో పార్టీ ప్రారంభించిన కమల్.. తొలుత 2019 లోక్‌సభ ఎన్నికల బరిలోకి దిగారు. 37 స్థానాల్లో పోటీ చేసిన ఆయన పార్టీ ఓటమిపాలైంది. ఆ తర్వాత 2021 అసెంబ్లీ ఎన్నికల్లో తమిళనాడులోని 142 స్థానాల్లో ఆయన తన అభ్యర్థులను నిలిపారు. కానీ, ఎక్కడా విజయం సాధించలేదు. కోయంబత్తూ సౌత్ నియోజకవర్గం నుంచి పోటీ చేసిన కమల్ బీజేపీ అభ్యర్థి నవతి శ్రీనివాసన్ చేతిలో 1300 ఓట్ల తేడాతో ఓటమి పాలయ్యారు. అయితే పోటీలో నిలిచిన తొలి ఎన్నికలలోనే కమల్ హాసన్ ఓటమి పాలు కావడం ఆయన అభిమాలను తీవ్ర ఆవేదనకు గురి చేస్తోంది.

తాజా కమల్ ఓటమిపై ఆయన కుమార్తె, నటి శృతి హాసన్ స్పందించింది. ‘మిమ్మల్ని చూస్తుంటే చాలా గర్వంగా ఉంది అప్పా(నాన్న)’ అంటూ ఆమె కమల్ ఫోటోని తన ఇన్‌స్టాగ్రామ్ ఖాతాలో పోస్ట్ చేసింది. దీంతో పాటు తన తండ్రి ఒక యోధుడు అనేందుకు చిహ్నంగా ఆమె ‘ది ఫైటర్’ అనే హ్యాష్‌ట్యాగ్‌ని కూడా జత చేసింది. ఈ పోస్ట్ ప్రస్తుతం సోషల్‌మీడియాలో వైరల్ అవుతోంది.

ఈ ఏడాది రవితేజా నటించిన ‘క్రాక్’ సినిమాలో, పవన్‌కళ్యాణ్ రీఎంట్రీ చిత్రం ‘వకీల్‌సాబ్‌’ శృతి హాసన్ హీరోయిన్‌గా చేసింది. ఈ రెండు సినిమాలో బ్లాక్‌బస్టర్ అవ్వడంతో శృతి మళ్లీ ఫామ్‌లోకి వచ్చిందంటూ అభిమానులు సంబరాలు చేసుకుంటున్నారు. ప్రస్తుతం ‘కే.జీ.ఎఫ్’ ఫేమ్ ప్రశాంత్ నీల్ దర్శకత్వంలో రెబల్ స్టార్ ప్రభాస్ నటిస్తున్న ‘సలార్’ అనే పాన్ ఇండియా సినిమాలో శృతి హీరోయిన్‌గా చేస్తోంది.