టాప్ డైరెక్టర్ చేతుల మీదుగా 'ఉయ్యాలవాడ' మోషన్ పోస్టర్

ఖైదీ నెంబర్ 150 తర్వాత మెగాస్టార్ చిరంజీవి హీరోగా నటిస్తున్న 151వ చిత్రం ఉయ్యాలవాడ నరసింహా రెడ్డి మోషన్ పోస్టర్ విడుదలకి ముహూర్తం ఇంకెంతో దూరంలో లేదు. చిరంజీవి పుట్టిన రోజు సందర్భంగా ఈ నెల 22న ఉయ్యాలవాడ ఫస్ట్ లుక్ మోషన్ పోస్టర్‌ని విడుదల చేయడానికి మూవీ యూనిట్ ఏర్పాట్లు చేసుకుంటోంది. ఫిలింనగర్ లేటెస్ట్ అప్‌డేట్స్ ప్రకారం బాహుబలి సినిమాతో టాలీవుడ్‌లోనే కాకుండా బాలీవుడ్‌లోనూ తన ఉనికిని చాటుకున్న టాప్ డైరెక్టర్ రాజమౌళి చేతుల మీదుగా ఈ సినిమా మోషన్ పోస్టర్ విడుదల కానున్నట్టు తెలుస్తోంది.

స్టైలిష్ డైరెక్టర్‌గా పేరున్న సురేందర్ రెడ్డి తెరకెక్కించనున్న ఈ సినిమాను మెగాపవర్ స్టార్ రామ్ చరణ్ నిర్మించనున్నాడు. ఇప్పటికే ఈ మోషన్ పోస్టర్ విడుదల కార్యక్రమానికి సంబంధించిన వేడుకకి రావాల్సిందిగా పలువురు టాలీవుడ్ సినీ ప్రముఖులకి ఆహ్వానాలు అందాయి. అమితాబ్ బచ్చన్ ఓ కీలక పాత్ర పోషించనున్న ఈ సినిమాలో మెగాస్టార్ సరసన నయనతార హీరోయిన్‌గా నటించనున్నట్టు సమాచారం.