‘మగధీర’ పనుల్లో రాజమౌళి బిజీ?

‘బాహుబలి’ సీరిస్‌తో తెలుగు సినిమాను అంతర్జాతీయ స్థాయికి తీసుకెళ్లిన దర్శకుడు రాజమౌళి.. ఇప్పుడు ‘మగధీర’ పనుల్లో బిజీగా ఉన్నారు. అదేంటీ, రాజమౌళీ ‘మగధీర’ పార్ట్ తీస్తున్నారా? అని సందేహిస్తున్నారా? అదేమీ లేదు. రామ్‌చరణ్, కాజల్ జంటగా 2009లో విడుదలైన ‘మగధీర’ సినిమా అప్పట్లో ఎంత విజయం సాధించిందో తెలిసిందే.

అయితే, ‘బాహుబలి’కి లభించినంత క్రేజ్ అప్పట్లో ‘మగధీర’కు లభించలేదు. అయితే, అది కేవలం తెలుగు ప్రేక్షకులను దృష్టిలో పెట్టుకున్న సినిమా కావడంతో దక్షిణాది భాషల్లో మినహా ఇతర భాషల్లోకి అనువాదించలేదు. ఈ సినిమా అప్పట్లో విదేశాల్లోనూ విడుదలైనా ఇంగ్లీష్, స్థానిక భాషల సబ్‌టైటిల్స్‌తో మాత్రమే ప్రదర్శించారు. పైగా, అప్పట్లో రాజమౌళికి అంత క్రేజ్ కూడా లేదు.

‘బాహుబలి’ సీరిస్ తర్వాత రాజమౌళి ఎంత క్రేజ్ సాధించాడతో తెలిసిందే. ముఖ్యంగా జపాన్‌లో ఆయనకు బ్రహ్మరథం పట్టారు. బహుమతులు, గ్యాడ్జెట్స్‌తో ‘బాహుబలి’పై తమకున్న అభిమానాన్ని చాటారు. ‘బాహుబలి’ పాత్రలతో అక్కడ పలు ఏమోజీలు కూడా హల్‌చల్ చేస్తున్నాయి. ఈ నేపథ్యంలో ‘మగధీర’ సినిమాను జపనీస్ భాషలోకి అనువాదించాలని రాజమౌళి భావిస్తున్నట్లు విశ్వసనీయ వర్గాలు తెలిపాయి. అయితే, దీనిపై చిత్రయూనిట్ ఇంకా ఎలాంటి అధికారిక ప్రకటన చేయలేదు.