‘బిగ్ బాస్’లో సునీల్.. థ్రిల్ ఫీలైన హరితేజ!

తెలుగులో ‘బిగ్ బాస్ షో’ ఎంత పాపులర్ అయ్యిందో అందరికీ తెలిసిందే. ఎన్టీఆర్ హోస్ట్‌గా వ్యవహరిస్తున్న ఈ షోకి కనీవినీ ఎరుగని రీతిలో రేటింగ్స్ వస్తున్నాయి. అందుకనే సునీల్ కన్ను కూడా ఈ షోపై పడింది. వరస పరాజయాలతో డీలా పడ్డ సునీల్.. తన కొత్త సినిమా ప్రచారం కోసం ‘బిగ్ బాస్’ను నమ్ముకున్నాడు. గురువారం ప్రసారమయ్యే ఎపిసోడ్‌లో బిగ్ బాస్ హౌజ్‌లో సునీల్ హంగామా చేయనున్నాడు. తను హీరోగా నటించిన తాజా చిత్రం ‘ఉంగరాల రాంబాబు’. ఈ సినిమా శుక్రవారం (సెప్టెంబర్ 15న) ప్రేక్షకుల ముందుకు వస్తోంది. ఈ సినిమా ప్రచారంలో భాగంగా విడుదలకు ఒకరోజు ముందు బిగ్ బాస్ ద్వారా ప్రచారం చేసుకుంటున్నాడు.

ఇప్పటికే స్టార్ మా ప్రోమోలను తన ట్విట్టర్ ఖాతాలో పెట్టింది. ఇదిలా ఉంటే.. సునీల్‌ని బిగ్ బాస్ హౌజ్‌లో చూసి హరితేజ చాలా థ్రిల్ ఫీలైంది. బుధవారం నాటి ఎపిసోడ్ అయిపోయిన తరవాత గురువారం ఏం జరగబోతోందో చూపించే ప్రోమోలో ఈ సన్నివేశాలు కనిపించాయి. ‘ఉంగరాల రాంబాబు సినిమా రేపు విడుదలవుతుంది’ అని సునీల్ అనగానే.. రేపా అని ఆశ్చర్యం వ్యక్తం చేసింది హరితేజ. ఇంతకీ హరితేజ ఎందుకంత ఆశ్చర్యానికి గురైందంటే.. ఆమె కూడా ‘ఉంగరాల రాంబాబు’లో ఓ పాత్ర పోషించింది. సుమారు రెండు నెలలుగా బిగ్ బాస్ హౌజ్‌లో లాకైపోయిన హరితేజ.. తన కొత్త సినిమా విడుదలవుతోందని తెలిసి చాలా ఆనందం వ్యక్తం చేసింది.
#UngaralaRambabu aka @Mee_Sunil in the BIGG house!!!#BiggBossTelugu Today at 9:30 PM on @StarMaa #OPPOBiggBoss @oppomobileindia pic.twitter.com/fo8XxX1uTQ — STAR MAA (@StarMaa) September 14, 2017
అయితే గురువారం స్టార్ మా ట్విట్టర్‌లో పెట్టిన ప్రోమోలో మాత్రం ఇలాంటివేమీ కనిపించలేదు. సునీల్ సీరియస్‌గా హౌజ్‌మేట్స్‌తో ఏదో గేమ్ ఆడిస్తున్నాడు. ఈ గేమ్‌లో భాగంగా హౌజ్‌మేట్స్ మధ్య చిరాకులు, పరాకులు.. ఇవే ఉన్నాయి ప్రోమోలో. ‘మానుప్యులేట్’ అనే అంశం చుట్టూ గురువారం షో నడిపించనున్నట్లు స్టార్ మా క్లూ ఇచ్చేసింది. షో ముగియడానికి ఇంకెన్నో రోజులు లేదు కాబట్టి ప్రేక్షకులను మరింత ఆకర్షించేలా ఎపిసోడ్‌లను ఎమోషనల్‌గా తీర్చిదిద్దుతున్నారు.