సునీల్ ‘2 కంట్రీస్’ ట్రైలర్: ఇదో జబర్దస్త్ కామెడీ!

స్టార్ కమెడియన్‌ రేంజ్ నుండి హీరోగా టర్న్ తీసుకున్న సునీల్ స్టార్టింగ్‌లో అందాల రాముడు, మర్యాద రామన్న చిత్రాలతో ఆకట్టుకున్నా ఆ తరువాత మనోడ్ని హిట్ పలకరించి నాలుగేళ్లు దాటింది. ఇటీవల ఉంగరాల రాంబాబు చిత్రంతో ప్రేక్షకుల మందుకు వచ్చినప్పటికీ అది కూడా నిరాశే మిగిల్చింది. దీంతో తన మార్క్ కామెడీని చూపించేందుకు ‘2 కంట్రీస్’ మూవీతో హీరోగా మరో ప్రయత్నం చేస్తున్నాడు సునీల్. తాజాగా ఈ మూవీ ట్రైలర్‌ను విడుదల చేసింది చిత్రయూనిట్.

శంకర్ స్వీయ దర్శకత్వంలో రూపొందిన ‘2 కంట్రీస్’ మూవీలో సునీల్ సరసన మనీషారాజ్ నటిస్తోంది. మలయాళంలో విజయం సాధించిన ‘2 కంట్రీస్’ మూవీని తెలుగులో అదే పేరుతో రీమేక్ చేస్తున్నారు. ఇక తాజా ట్రైలర్ విషయానికి వస్తే.. ఈ మూవీ షూటింగ్ ఎక్కువ భాగం అమెరికాలో షూట్ చెయ్యడంతో ట్రైలర్ చాలా రిచ్‌గా కనిపిస్తుంది. ఇక ఎప్పటిలాగే సునీల్ పంచ్‌లు పేల్చే ప్రయత్నం చేశాడు. సునీల్‌తో పాటు జబర్తస్త్ కామెడీ షో కమెడియన్స్ మొత్తాన్ని ‘2 కంట్రీస్’ సినిమాలోకి లాక్కొచ్చి ప్రేక్షకుల్ని ఫుల్ ఎంటర్టైన్ చేసే ప్రయత్నం చేశాడు దర్శకుడు.

పృథ్వీ, శ్రీనివాసరెడ్డి, నరేష్‌ లాంటి సీనియర్ కమెడియన్స్‌తో పాటు.. జబర్దస్త్ షేకింగ్ శేషు, అప్పారావులు తాజా ట్రైలర్‌లో కామెడీ పండిస్తున్నారు. అయితే రెండున్నర గంటల పాటు ప్రేక్షకులకు బోర్ కొట్టించకుండా ఈ జబర్దస్త్ కామెడీతో దర్శకుడు సినిమాను ఎలా నడిపించాడో తెరపై చూడాలి. కమెడీ ప్రధానంగా సాగే ‘2 కంట్రీస్’ కథలో లవ్ అండ్ ఎమోషన్స్ సీన్స్‌కూడా బాగానే ఉన్నాయి. ఇక సునీల్ గత చిత్రాల మాదిరిగా ఫైట్లు, డాన్స్‌లతో ఇరగదీసే ప్రయత్నం చేయకపోవడంతో తన మార్కు కామెడీ మాత్రమే ఈ ట్రైలర్‌లో దర్శనం ఇస్తుంది. గోపి సుందర్ సంగీతం అందిస్తున్న ‘2 కంట్రీస్’ మూవీ త్వరలోనే ప్రేక్షకుల ముందుకు రానుంది.