పంచెకట్టు‌తో.. రోడ్లపై సూపర్‌స్టార్ సైకిల్ సవారీ

వెండితెరపై ఎలాంటి పాత్రకైనా ప్రాణం పోయగల నటుల్లో మలయాళం సూపర్ స్టార్ మోహన్‌లాల్ కూడా ఒకరు. సినిమాల్లో ఆయన నటనకే కాదు.. తెరవెనుక ఆయన నిరాడంబరతని కూడా అభిమానులు తెగ ఇష్టపడుతుంటారు. తాజాగా త్రివేండ్రం రోడ్లపై ఉదయం 4 గంటల సమయంలో సాధారణ వ్యక్తిలా మోహన్‌లాల్ సైకిల్‌పై చక్కర్లు కొట్టినట్లు స్థానిక మీడియా వెల్లడించింది. ఈ సవారీకి సంబంధించిన ఫొటోలు ఇప్పుడు నెట్లో హల్‌చల్ చేస్తున్నాయి.

సాధారణ మలయాళీ తరహాలో తెల్ల షర్టు, లుంగీ ధరించిన మోహన్‌లాల్ రోడ్లపై సైకిల్‌తో సవారీ చేయడం ఇప్పుడు అందర్నీ ఆశ్చర్యపరుస్తోంది. ఉదయం అయితే రోడ్లపై జనంతో ఇబ్బంది ఉండదని భావించే ఈ సూపర్‌ స్టార్ రైడ్‌ని ఎంచుకున్నట్లు తెలుస్తోంది. ఏదైతేనేం మరోసారి తన నిరాడంబరతను మోహన్‌లాల్ ఇలా చూపించాడంటూ నెటిజన్లు తెగ కామెంట్ చేస్తున్నారు. ఇటీవల తెలుగులో కూడా వరుస సినిమాలు చేస్తున్న మోహన్‌లాల్ ప్రస్తుతం అల్లు శిరీష్‌తో కలిసి ఓ చిత్రంలో నటిస్తున్నారు.