కాలాకు సుప్రీం కోర్టులో లైన్ క్లియర్!

‘కాలా’ సినిమాకు ఒక్కో కోర్టులో లైన్ క్లియర్ అవుతోంది. ఈ సినిమా విడుదలపై స్టే విధించాలని పడిన పిటిషన్లు కొట్టివేతకు గురి అవుతూ ఉన్నాయి. కర్ణాటకలో ఈ సినిమా విడుదలకు నిన్ననే ఆ రాష్ట్ర హై కోర్టు గ్రీన్ సిగ్నల్ ఇచ్చింది. కావేరీ జలవివాదంలో రజనీకాంత్ వ్యాఖ్యలకు నిరసనగా ఈ సినిమాను కన్నడనాట విడుదల చేయకూడదన్న డిమాండ్‌ను హై కోర్టు తోసిపుచ్చింది. ఈ సినిమా కర్ణాటకలో విడుదల అవుతుందని, థియేటర్ల వద్ద భద్రత కల్పించే బాధ్యత కూడా ప్రభుత్వానిదే అని హై కోర్టు స్పష్టం చేసింది.

కర్ణాటకలో అలా గ్రీన్ సిగ్నల్ వచ్చినా.. వివిధ కోర్టుల్లో కాలాపై ఇంకా పలు పిటిషన్లు పెండింగ్‌లో నిలిచాయి. వాటిల్లో ఒకదాన్ని సుప్రీం కోర్టు కొట్టి వేసింది. కాలా సినిమా కథ తనది అని, ఒక రచయిత దాఖలు చేసిన పిటిషన్ పై సుప్రీం స్పందించింది. కాపీ రైట్ వివాదంతో ఈ సినిమా విడుదలను ఆపేయాలని ఆ రచయిత కోరగా.. దానికి సుప్రీం కోర్టు నిరాకరించింది.

ఈ సందర్భంగా ఆసక్తిదాయకమైన వ్యాఖ్యలు కూడా చేసింది న్యాయస్థానం. ఈ సినిమా గురించి అంతా ఆసక్తితో చూస్తున్నారని.. విడుదలను ఆపలేమని సుప్రీం కోర్టు స్పష్టం చేసింది. ఈ విధంగా కాలా పై కాపీ రైట్ పిటిషన్ తిరస్కరణకు గురి అయ్యింది.

ఇక తమిళనాట కూడా ఈ సినిమాపై మరో పిటిషన్ పెండింగ్‌లో ఉంది. ఈ సినిమా విడుదలను ఆపాలని నాడార్ సంఘం పిటిషన్ దాఖలు చేసింది. దానిపై విచారణ ఈ రోజే జరగనుంది.