నాపై 15 ఏళ్ల పిల్లాడు చేయివేశాడు: సుష్మితాసేన్

సినీ తారలు బయటి ప్రపంచంలోకి వస్తున్నారంటే వారి చుట్టూ రక్షణ వలయం ఉంటుంది. కండలుతీరిన బౌన్సర్లు వారికి రక్షణ కల్పిస్తూ ఉంటారు. ఎంత రక్షణ ఉన్నా కొంత మంది ఆకతాయిలు ఏదో ఒక సందులో నుంచి ఆ తారలను తాకడానికి చూస్తుంటారు. ఇలాంటి అనుభవమే బాలీవుడ్ హీరోయిన్, మాజీ మిస్ యూనివర్స్ సుష్మితాసేన్‌కు ఎదురైంది. తాను ఒకసారి బయటికి వెళ్లినప్పుడు ఓ 15 ఏళ్ల కుర్రాడు తనపై ఎలా చేయివేశాడో ఇటీవల నిర్వహించిన ఓ మీడియా సమావేశంలో సుష్మితా వివరించారు.

‘మా చుట్టూ బాడీగార్డ్స్ ఉంటారు కాబట్టి మాపై ఎవరైనా అసభ్యంగా ప్రవర్తించడం లాంటివి జరగవని చాలా మంది అనుకుంటూ ఉంటారు. కానీ అది నిజం కాదు. నా చుట్టూ 10 మంది బాడీగార్డులు ఉన్నా అసభ్యంగా ప్రవర్తించేవాళ్లను ఆపలేం. 10 మంది బాడీగార్డులతో 100 మంది జనం మధ్యలోకి వెళ్లినప్పుడు మాతో అసభ్యంగా ప్రవర్తించేవారిని ఎవరు ఆపగలరు? ఆరు నెలల క్రితం జరిగిన ఓ అవార్డు ఫంక్షన్‌లో 15 ఏళ్ల పిల్లాడు నన్ను అసభ్యకరంగా తాకాడు. అంతమంది జనంలో నేను అతన్ని గుర్తించలేనేమో అనుకున్నాడు. కానీ, అతని ఆలోచన తప్పు. నా వెనుక నుంచి వస్తోన్న అతని చేతిని నేను గట్టిగా పట్టుకున్నాను. ముందుకు లాగాను. కానీ ఆ 15 ఏళ్ల పిల్లాడిని చూసి షాకయ్యాను. తన మెడపై చేయివేసి నాతో పాటే తీసుకెళ్లాను’ అని సుష్మితాసేన్ వెల్లడించారు.

‘ఆ సమయంలో నేను గట్టిగా అరిచినా, ఏడ్చినా నీ జీవితం నాశనమై ఉండేది’ అని ఆ బాలుడితో అన్నట్లు సుష్మితా తెలిపారు. ‘నేను చేయివేయలేదు అని ఆ పిల్లాడు మొదట బుకాయించాడు. కానీ చివరికి తన తప్పు తెలుసుకున్నాడు. నాకు క్షమాపణలు చెప్పాడు. మళ్లీ ఇలాంటి తప్పు ఎప్పుడూ చేయనని మాటిచ్చాడు. నేను అతనిపై ఎలాంటి చర్యలు తీసుకోలేదు. ఎందుకంటే అతను 15 ఏళ్ల పిల్లాడు. తాను చేసింది సరదా కాదు నేరమని అతనికి తెలీదు. అందుకే అతన్ని మందలించి వదిలేశాను’ అని సుష్మితా తనకు ఎదురైన అనుభవం గురించి చెప్పారు.