కన్నడ భాషలోకి ‘సైరా’ అనువాదం?

కన్నడ భాషలోకి ఇతర భాషల నుంచి సినిమాలు అనువాదం కావడంపై దశాబ్దాలుగా ఉన్న నిషేధం ఇటీవలే తొలగిపోయింది. ఇటీవలే తమిళ సినిమా ‘వివేగం’ కన్నడలోకి ‘కమాండో’ పేరుతో అనువాదం అయ్యింది. అజిత్ నటించిన ఆ సినిమా తమిళంలో ఫ్లాప్. అయినప్పటికీ కన్నడలోకి అనువదించి విడుదల చేశారు. కన్నడలో ఈ విధంగా దశాబ్దాల తర్వాత ఒక అనువాద సినిమా ఆడుతోంది.

ఇక తాజాగా తెలుగులో రూపొందుతున్న భారీ సినిమా ‘సైరా’ కూడా కన్నడలోకి అనువాదం కాబోతోందని వార్తలు వస్తున్నాయి. తొలితరం స్వతంత్ర సమరయోధుడు ఉయ్యాలవాడ నరసింహారెడ్డి జీవిత కథ ఆధారంగా ఈ సినిమా రూపొందుతోంది. చిరంజీవి టైటిల్ రోల్‌లో నటిస్తున్న ఈ సినిమాలో ఇతర భాష నటీనటులు కూడా కనిపించనున్నారు. శాండల్‌వుడ్ కు సంబంధించిన స్టార్ హీరో సుదీప్ కూడా ఈ సినిమాలో నటిస్తున్నాడు.

తెలుగులోనే కాకుండా ‘సైరా నరసింహారెడ్డి’ని తమిళ, హిందీ భాషల్లో కూడా విడుదల చేయనున్నారు. అక్కడ డబ్బింగులకు అడ్డంకులు లేవు. ఇప్పుడు కన్నడనాట కూడా అనువాద సినిమాలకు అవకాశం ఏర్పడుతోంది. కాబట్టి ఈ సినిమా ఆ భాషలోకి కూడా అనువాదమై విడుదల అవుతుందేమో చూడాలి!