ప్రభాస్‌కి తమన్నా ఈసారైనా కలిసొస్తుందా?

‘బాహుబలి’ వంటి క్రేజీ ప్రాజెక్ట్ తరువాత ప్రభాస్ నటిస్తోన్న చిత్రం 'సాహో'. సుజీత్ దర్శకత్వం వహిస్తోన్న ఈ సినిమాను యూవీ క్రియేషన్స్ బ్యానర్‌పై దాదాపు రూ. 150 కోట్ల బడ్జెట్‌తో నిర్మిస్తున్నారు. ‘బాహుబలి 2’ సినిమా విడుదలకు ఒక్కరోజు ముందొచ్చిన 'సాహో' టీజర్ కూడా యూ ట్యూబ్‌లో దూసుకుపోతోంది. ఇప్పటి వరకు ఈ టీజర్‌కు 58 లక్షలకు పైగా వ్యూస్ వచ్చాయి. టీజర్ హాలీవుడ్ రేంజ్‌లో ఉండడంతో ఇక సినిమా ఎలా ఉండనుందనే ఆసక్తి అభిమానుల్లో పెరిగిపోయింది.

అయితే ఈ సినిమాలో హీరోయిన్ ఎవరనే విషయంలో ఇంకా స్పష్టత రాలేదు. బాలీవుడ్ నుంచి హీరోయిన్‌ను రంగంలోకి దింపే ప్రయత్నాలు జరుగుతున్నాయని.. త్వరలోనే ఓ బ్యూటీని ఫైనల్ చేస్తారనే టాక్ వినిపించింది. అయితే ఇప్పుడు ఆ నిర్ణయాన్ని పక్కన పెట్టేసినట్లు తెలుస్తోంది. ఆ బ్యూటీ స్థానంలో తమన్నాను తీసుకోవాలని భావిస్తున్నారట.

గతంలో ప్రభాస్, తమన్నా కాంబినేషన్‌లో వచ్చిన ‘రెబల్’ సినిమా ఫ్లాప్ అయినప్పటికీ రీసెంట్‌గా వచ్చిన ‘బాహుబలి’ మాత్రం సెన్సేషన్ క్రియేట్ చేసింది. దీంతో మరోసారి ఈ కాంబినేషన్‌ను రిపీట్ చేయాలని చిత్రబృందం నిర్ణయించుకుందని సమాచారం. అసలు అవకాశాలు లేక డీలా పడ్డ తమన్నాకు ఇదొక బంపర్ ఆఫర్ అనే చెప్పొచ్చు.