విజయ్ దేవరకొండతో పెళ్లి.. క్లారిటీ ఇచ్చిన హీరోయిన్

తమిళనాడుకు చెందిన నటి ఐశర్య రాజేష్ తన సహనటుడితో ప్రేమలో ఉన్నారని, వచ్చే సంవత్సరం ఆమె పెళ్లి కూడా చేసుకుంటారని గత కొద్ది రోజులుగా రూమర్లు వినిపిస్తున్నాయి. ఆ నటుడు మరెవరో కాదు మన సెన్సేషనల్ స్టార్ విజయ్ దేవరకొండ. ప్రస్తుతం ఆమె విజయ్ దేవరకొండ, క్రాంతి మాధవ్ కాంబినేషన్‌లో తెరకెక్కుతోన్న సినిమాలో ఒక హీరోయిన్‌గా నటిస్తున్నారు. దీంతో కొత్త రూమర్ మొదలైంది. విజయ్‌తో ఐశ్వర్య ప్రేమాయణం నడుపుతున్నారని, పెళ్లి కూడా చేసుకుంటారని ప్రచారం చేశారు. ఈ రూమర్‌పై తాజాగా ఐశ్వర్య స్పందించారు.

‘నా లవ్ స్టోరీ గురించి కొద్ది రోజులుగా రూమర్లు వింటున్నాను. దయచేసి ఆ వ్యక్తి ఎవరో నాకు కూడా చెప్పండి. ఆయనెవరో తెలుసుకోవాలని నాకు చాలా ఆత్రుతగా ఉంది. దయచేసి ఇలాంటి అసత్య వార్తలను వ్యాప్తిచేయడం ఆపండి. అలాంటిది ఏమైనా ఉంటే ఆ విషయాన్ని మీ అందరికీ చెప్పే తొలి వ్యక్తిని నేనే. ఒంటరి జీవితం చాలా సంతోషంగా గడుపుతున్నాను’ అని ట్విట్టర్‌లో ఐశ్వర్య పేర్కొన్నారు.
తన ట్వీట్‌లో విజయ్ దేవరకొండ పేరు పేర్కొనకపోయినా ఆమె స్పందించింది ఆయన గురించే అని స్పష్టంగా అర్థమవుతోంది. వాస్తవానికి విజయ్ దేవరకొండకు ఆయనతో నటించిన హీరోయిన్లకు లింకు పెడుతూ రూమర్లు రావడం కొత్తేమీ కాదు. గతంలో ‘అర్జున్ రెడ్డి’ హీరోయిన్ షాలిని పాండే, ‘గీత గోవిందం’ హీరోయిన్ రష్మిక మందనతో విజయ్ ప్రేమాయణం సాగిస్తున్నట్లు రూమర్లు వచ్చాయి. వాటిలో ఏదీ నిజం కాదని తరవాత తేలింది. ప్రస్తుతం ఐశ్వర్య రాజేష్ విషయంలోనూ అదే జరిగింది.