మెగాహీరో కోసం కొత్త విలన్!

తెలుగు తెరపై హీరోల కంటే విలన్స్ చేసే సందడి ఎక్కువైంది. ప్రతి సినిమాకు ఓ కొత్త విలన్ పుట్టుకొస్తున్నాడు. ప్రేక్షకుల్లో కూడా యంగ్ విలన్స్‌పై ఆసక్తి బాగా పెరిగింది. ఇప్పటికే హీరో ఆది, నవీన్ చంద్రలు విలన్లుగా మారారు. అల్లు అర్జున్, నాని వంటి హీరోలు సైతం మంచి విలన్ రోల్ దొరికితే నటించడానికి ఆసక్తి చూపుతున్నారు. ఇప్పుడు వీరి జాబితాలోకి మరో హీరో చేరిపోయాడు.

తమిళంలో హీరోగా మంచి గుర్తింపు తెచ్చుకున్న ప్రసన్న 'అంజాదే' అనే సినిమాలో విలన్‌గా కనిపించాడు. ఈ సాఫ్ట్, హ్యాండ్సమ్ హీరో మరెవరో కాదు నిన్నటితరం నాయిక స్నేహ భర్త. తాజాగా ప్రసన్న ఓ మెగాహీరో సినిమాలో విలన్‌గా కనిపించడానికి రెడీ అవుతున్నట్లు సమాచారం. సాయి ధరం తేజ్ హీరోగా బీవీఎస్ రవి దర్శకుడిగా 'జవాన్' అనే సినిమా ప్రారంభమైన సంగతి తెలిసిందే. ఈ సినిమాలో మెహ్రీన్‌ను హీరోయిన్‌గా అలానే ప్రసన్నను విలన్‌గా ఎంపిక చేసుకున్నాడు దర్శకుడు. మరి ఈ హీరోగారు విలన్‌గా తెలుగు తెరపై ఏ మేరకు మెప్పిస్తారో.. చూడాలి!