అమితాబ్‌పై విరుచుకుపడ్డ తనుశ్రీ!

బాలీవుడ్ సీనియర్ నటుడు నానా పటేకర్ పై సంచలన ఆరోపణలు చేసిన నటి తనుశ్రీ దత్తా ఇప్పుడు మరో వెటరన్ అమితాబ్ పై విరుచుకుపడింది. ఇండస్ట్రీలో హీరోయిన్లపై సాగే లైంగిక వేధింపుల గురించి మాట్లాడుతున్న తనుశ్రీ .. అనూహ్యంగా అమితాబ్ పై ఫైర్ అయ్యింది. ఆ సీనియర్ హీరో తనకు మోరల్ సపోర్ట్ ఇవ్వలేదనే ఆగ్రహాన్ని వ్యక్తం చేసింది ఈ నటీమణి.

ప్రస్తుతం బాలీవుడ్ లో తనుశ్రీ చేసిన ఆరోపణలపై చర్చ జరుగుతూ ఉంది. సీనియర్ నటుడు నానా పటేకర్ 2008లో ఒక సినిమా షూటింగ్ సందర్భంగా తనను లైంగికంగా వేధించాడని ఈ నటీమణి ఆరోపిస్తోంది. అలాగే తను నటించిన ‘చాక్లెట్’ సినిమా షూటింగ్ సందర్భంగా కూడా తను లైంగిక వేధింపులకు గురి అయ్యానని, ఆ సినిమా దర్శకుడు వివేక్ అగ్నిహోత్రి తనను నగ్నంగా డ్యాన్స్ చేయాలని అడిగాడని తనూశ్రీ వ్యాఖ్యానించింది.

ఈ ఆరోపణలపై అనేక మంది నటీనటులు స్పందిస్తున్నారు. ఈ నేపథ్యంలో.. అమితాబ్ వద్ద కూడా ఈ ఆరోపణల ప్రస్తావన వచ్చింది. దీనిపై స్పందించడానికి నిరాకరించాడు బిగ్ బి. ఆ వ్యవహారంతో తనకు సంబంధం లేదన్నట్టుగా వ్యాఖ్యానించారాయన. దీంతో తనుశ్రీకి కోపం వచ్చింది.

అమితాబ్ బచ్చన్ తన ఆరోపణలపై స్పందించాల్సిందని, అనేక సామాజిక విషయాలపై రూపొందే సినిమాల్లో నటించే ఆయన ఈ వ్యవహారం పై స్పందించకపోవడం ఏమిటని తనుశ్రీ ప్రశ్నిస్తోంది.